租車會親朋 $2,275起新年駕到

仲有唔夠兩個星期就過農曆新年,到親友家中拜年已成為指定動作,不過,要你一日走幾個地區作客,冇部車都唔知點搞!今年,多間租車公司都推出了農曆新年租車優惠,四天三夜的租車套餐低至$2,275。據知,部分熱門MPV已租出七七八八,所餘數量不多,唔想拎住一袋二袋糖果、曲奇喺街同人爭的士,仲唔快啲去Book定架車?

操控細節要留神

七、八人車的優點係載得人多,適合一家大細去拜年,但缺點是車身較重,耗油量較多,如用不着咁大部車,揀車仔其實更划算,而且更易操控。汽車科技日新月異,近年不少新車都改用電子手掣,部分更設有「Auto Hold」、「Auto Start/Stop」等電子設備,如果唔知點用一定要問清楚,千祈唔好怕醜,揸車唔係講玩呀!仲要提提各位,停車熄匙條例已經生效,停車等人記得關掉引擎,如果唔係有機會被票控,罰款$320。

取車前要驗真

在租車公司取車前,記得檢查清楚車輛狀態,譬如有否車身凹痕、輪圈刮花等,如有發現,應立即通知負責人,將有問題的地方記錄下來,避免還車時有爭拗。此外,部分規模較大的租車公司更備有電動車出租,但租車前記得問清楚如何充電,並索取電動車充電設施位置資料,半路中途冇電「跪低」搵拖車就無謂啦!目前,全港約有330個充電站,其中有3個地方設有快速充電器,以日產(Nissan)Leaf為例,只需30分鐘便可充回8成,滿電最高續航力為160km。但如果要一日走勻港、九、新界多個地區,路程長達二、三百公里,傳統汽油私家車會較適合。

車款推介

二人世界Opel Corsa

Corsa的造型充滿動感,明顯是針對年輕人而來,雖然三門設計對乘客出入有點不便,但對於兩公婆嚟講就啱晒,前面坐人、後座用來擺禮品。此外,Corsa有靈活的操控表現,去山路兜風一樂也。

費用:$2,275/4天(a)

豪過佳節Mercedes-Benz S350L

S-Class是頂級豪華轎車的代表之一,除了外形夠霸氣外,乘坐質素亦舒適無比,揸去拜年夠晒氣派。S350L搭載272匹3.5公升V6引擎及七前速自動波,並配上電子氣壓避震,快得來又夠定。

費用:$8,840/4天(a)

年年「油」餘Honda Jazz

Jazz擁有一副型格賣相,其1.3公升引擎配無段變速波箱可輸出86匹馬力,而且超級慳油,以近日的油價來計算,分分鐘可做到$1.2/km樓下,揸大長途都唔會肉赤!

費用:$2,275/4天(a)

趣味滿載Lexus RX350

RX350走City SUV路線,擁有豪華內櫳及高度舒適性之餘,亦擁有一定的Off-road能力,用來行吓大運走鄉郊路就最適合不過。RX350配上一副270匹3.5公升V6引擎,同時搭載五前速加減波箱,增添駕駛趣味。

費用:$7,350/7天(b)

綠色新年Nissan Leaf

芸芸電動車中,Leaf的技術稱得上非常成熟,想過環保新年確是不二之選。其最高續航力可達160km,除為數逾三百個的充電站外,目前本港有3個地方設置快速充電器,分別位於鴨脷洲、佐敦及香港科學園。

費用:$2,860/4天(a)

最啱大家族 Toyota Alphard 350 Super Deluxe

此車乃是豐田的頂級MPV,前排乘客席及中排均設有Ottoman座椅,椅背及腳靠可作多角度調校,在車上都可瞓個好覺,拜年走多幾場都唔怕攰。另一方面,原廠已備有遙控電趟門、三區域恒溫冷氣,非常齊料。

費用:$8,400/7天(b)

輕鬆載賀禮Nissan Serena

Serena的最大賣點是車廂夠大,坐上7名成年人都不會覺得擠迫,若有需要,更可透過放平後座來增加載物量,擺放多多賀禮都游刃有餘。另外,此車設有雙趟門,並以低地台設計,長輩都可輕鬆上落。

費用:$3,640/4天(a)

接送親朋Toyota Wish 1.8

Wish以2+3+2座位布局,前、中、後三排都有寛敞空間,而且更可按需要收摺座椅來騰出更大的載物位置。動力方面,其1.8公升VALVEMATIC引擎動力輸出充裕,而且油耗不高,每公升可行駛16.7km,一大班人出入好適合。

費用:$4,600/7天(b)

預約海外租車

很多港人都鍾意自駕遊,但相信唔少人都試過在海外租車出現「雞同鴨講」的情況,特別在一些非旅遊區的小鎮,出動埋身體語言、畫公仔都唔掂。為方便自駕遊市民,部分租車公司提供代辦海外租車服務,在內地、日本等多個大城市都可以取車,而且大部分手續都可在香港辦妥,唔識外語都唔係問題!

撰文:鄭浩文 

攝影:梁偉德

模特兒:Jason、Rain(Fame)

查詢電話:(a)2768 2277(大昌行汽車租賃)

(b)2880 1515(皇冠汽車租車部)