李玟約定老公 Once a week

國際華人天后李玟（CoCo）月前與拍拖八年的利豐集團執行總裁Bruce Rockowitz拉埋天窗，正式結束愛情長跑。婚後的她容光煥發，面上更時刻掛着甜蜜笑容，幸福之情不言而喻。「我覺得結婚前與結婚後都一樣咁開心，都係一樣咁enjoy對方嘅company。如果一定要講有咩分別，就係依家更relax嘅開心。」

飛嚟飛去為見一面

相信大家必定十分好奇，到底一對處於蜜月期的小夫妻，如何度過婚後的美好時光？CoCo一臉無奈地表示：「我哋結咗婚之後，其實只係見過兩日，連蜜月都未有時間去。因為實在係太忙，成日要飛嚟飛去。不過佢完全冇向我投訴過，因為佢知我好熱愛工作。我做嘢有好成績，佢都好戥我開心！」

情到濃時，一對新人不禁咀嘴，大晒恩愛。	CoCo與Bruce豪花1.5億打造「世紀婚禮」。	CoCo與兩名繼女（左二及右二）的關係良好，無所不談，更被催生混血B。

所謂小別勝新婚，尤其兩個忙得不可開交的事業型人士走在一起，反而更珍惜二人共處的時光。「我哋想盡量keep住一個星期見一次，所以成日都互飛去對方身處嘅國家見面。」他們不介意犧牲自己的休息時間，長途跋涉去見對方一面。為了維繫這段感情，雙方都付出相當大的努力。

CoCo、Bruce、兩名女兒與Alicia Keys（左）於台上合唱，掀起婚禮全晚高潮。	CoCo笑言要學好廚藝，為Bruce炮製大餐。	CoCo於私人時間，只會作輕便打扮。

初次見面認定對方

CoCo坦言第一次與Bruce見面時，已認定對方為終身伴侶，拍拖八年更從未出現感情問題。「其實由始至終，我哋都覺得結婚係一定會做嘅事，只係timing問題。之前大家太忙，放唔低手頭上嘅工作。不過正式促成我哋嘅婚事，係喺兩年前，佢搞咗個驚喜嘅生日party畀我。佢book咗間餐廳，仲用我最鍾意嘅紫色嚟布置場地，有花、有蠟燭，仲有人拉小提琴，真係好浪漫。佢仲喺我啲屋企人同好朋友面前向我求婚。因為佢係一個怕羞嘅人，佢喺咁多人面前同我求婚，真係令我好shock、好感動！」

1.5億打造世紀婚禮

豪花1.5億去打造「世紀婚禮」，堪稱嫁得最豪、最風光的CoCo，叫所有女生羨慕不已。他們更專誠請來美國天后Alicia Keys、著名男歌手Bruno Mars、Ne-yo等為婚禮的表演嘉賓，為賓客們帶來一個熱鬧又難忘的晚上。但豪擲過億元去打造一個婚禮，會否覺得過分奢侈？「個婚禮我花咗年半時間去籌備，不過其實我冇諗太多。我淨係想Bruce開心、朋友開心，想令大家覺得自己係VIP。希望畀大家一個難忘嘅party，好好享受音樂，最緊要have a good time！」

為老公學揚州炒飯

榮升為Mrs. Rockowitz的她，立志要成為一個「入得廚房、出得廳堂」的好老婆。「我完全唔識煮嘢食，依家嘅目標係學煮佢最鍾意食嘅Italian food，同埋揚州炒飯！」至於會否生兒育女，生一個龍B？她坦言暫時未有任何生育計劃，相反兩名繼女則時常催促他們生個混血B，令她哭笑不得。「我同兩個女溝通得好好，好傾得埋。佢哋會同我講吓學校啲男仔，又會講吓扮靚、護膚心得，就好似best friends咁。」

最愛牛記笠記

有一套個人時尚美學的CoCo，表示挑衣服首要配合自己的身形，輕便舒適亦是不可或缺的條件。「雖然工作嘅時候，成日都着到好花枝招展，但係平日嘅我係鍾意着牛仔褲、boots，同一件over size嘅tee。最緊要覺得輕鬆自在，無拘無束。」

護膚品氹奶奶

忙得不可開交的CoCo，笑言自己最着重皮膚護理。「藝人成日都要化妝，所以我平日都唔會化，同埋會好努力用護膚品同敷mask。我最鍾意用Estee Lauder嘅Creme，用完之後真係覺得好似變番BB嘅皮膚咁。嚟緊我去探Bruce嘅媽媽，都諗住買嚟送畀佢！」

採訪：龔凱欣

攝影：鄭家俊