美國CES直擊LG OLED TV快到冇影

玩3D電視，以前只得兩種選擇，不是Plasma便是LCD，然而踏入2012年，用家終於有新選擇！說的是LG在全球最大消費電子展CES展出的EM9600立體電視，坐擁最大55吋OLED面板，顏色準確兼還原度高，最重要是顯示速度比傳統面板快成千倍，以後打機睇戲，可以完全同殘影講Bye Bye！

新OLED系列可改用浮空腳架，感覺勁輕巧！

顏色逼真自然

OLED比傳統屏幕更輕更薄，惟受良率低及成本貴所限，量產型號一直不多。LG屬少數坐擁OLED技術的廠商，早前出過31吋的OLED面板，如今CES再擴大至55吋，齋講數字已相當驚人！小記現場睇EM9600時，更覺畫面舒服自然，原來廠商背後用了4-Color Pixel四色圖元技術，以紅、藍、綠、白色來處理畫面，顏色比傳統RGB技術更連貫準確，同時解決了不同角度觀賞時的色差問題。最吸引是OLED先天反應快，顯示速度是LED及LCD面板的1,000倍，無論畫面郁得幾快都唔會有殘影，至啱用來煲動作猛片。而且機身厚度僅4mm，可套上新式Airy Floating浮空腳架，感覺將巨型畫面懸空似的，輕巧得來好科幻！

體感操控Smart TV

去年LG力谷Smart TV，令Apps數量增加至1,200個。今年Smart TV不但可登入facebook及twitter等社交網絡，還新增3D Zone搜羅大量3D電影，以後唔愁冇戲睇！操作方面，上年拎住Magic Motion遙控器郁兩吓就落到指令，今次升級版除加入人體工學設計，還追加收音咪，用戶開句聲便能作語音輸入，方便到暈！若嫌仲未夠User-Friendly，今年還有Gesture Cam新體感配件，讓用家透過手勢控制電視，例如握緊拳頭揀Apps，順時針打轉則增加音量等。另支援Intel最新的WiDi技術，透過無線網絡把電視、電腦連繫；若用埋Smart Share Plus功能，電腦內容仲可以分享畀電視睇。

OLED電視採用四原色，畫面逼近實景。

84吋3D UD電視超浮誇，並有齊Cinema 3D新技術。

新機追加體感操控，郁吓隻手便落到指令。

一芒兩睇Cinema 3D

至於另一焦點Cinema 3D電視，今年亦有大量新技術，當中2D-to-3D轉換及3D Depth Control功能相當好用，前者可把2D電影切換成立體；後者則讓用戶自由調校立體深度，想畫面幾凸都得！針對機迷，Cinema 3D還加入了一項「Dual Play」功能，跟以前雙打只能用半邊屏幕不同，現在用家只要戴上專用眼鏡，便能在電視睇到自己部分的全屏幕畫面，換句話說一芒兩睇，慳番唔少錢！尺寸方面，今年會有42吋至55吋等選擇，嫌未夠浮誇？現場還擺放了全球最大、畫面達84吋的3D UD電視，解像度高達3,840×2,160，畫質比全高清電視高4倍！