瀛Phone達人Simon Lam向主流說不！

引入日系機 同行看不穿

三禾電氣原名「三友電氣」，「三友」指當初成立的3位朋友，「電氣」日語中有電器之意。由此可見，Simon當初是由電器起家，他表示︰「香港人向來崇日，只要是Made in Japan就會買，所以初開舖時，我們主要在好景商場做日本電器批發，間中才幫客人搵日系手機。後來Vodafone於06年出了部802SE，因為外形靚兼解到鎖，便大膽引入香港，殊不知大受歡迎，自此便轉型賣日系手機了。」Simon其後於先達正式開設門市，但卻不被行家睇好。「佢哋個個以為我癲咗，事關當時日系機全部有SIM Lock（網絡鎖），來到香港好多『分唇』都用唔番；而且嗰時網絡商都有賣SH833等日系機，壓力唔細。好彩事實證明我冇決定錯！」

機緣巧合 大手入貨

正如Simon話齋，香港人崇日，而且日系機外形琳琅滿目，影相、屏幕質素又比同期手機型號先進幾年，因此即使問題多多，依然有一班忠實粉絲支持。「很多玩家都愛追手機，佢哋唔鍾意同人撞款，日系機正正滿足到佢哋要求。試過有玩家一知道我入咗新型號，第二朝就企喺舖頭等我開門，瘋狂程度唔差過依家啲iPhone信徒！」目前Simon平均月賣200部手機，日本有新型號推出，他隔一天便能運到香港，如此神速，全靠完善的人際網絡，他表示︰「去開日本都知，佢哋出手機要簽約上台先買到，當初入貨時都係靠幾個日本朋友幫手出機，但這做法始終有貨源限制。後來機緣巧合認識到供應商，佢哋能以特別價錢賣手機給我，之後才能大手入貨。」

首玩卡貼解鎖 以前日系機有SIM Lock限制時，都要以卡貼或Hyper SIM解鎖，Simon可說是這方面的先驅。

首間瀛Phone潮店 一般手機舖多設於先達，三禾特別於銅鑼灣開設瀛Phone新店，走簡約路線，極具原宿潮店味道。

屢遇難題 見招拆招

然而，大手入貨之時，卻處處碰壁。「日本人做生意好講信用，當初冇人教路，入貴貨又試過，入壞貨又試過，但為咗建立關係，初期惟有統統『硬食』！不過跟日本人做生意有個好處，就係佢哋嚴守紀律，仲記得去年大地震時，跟我接洽的供應商個個都緊守崗位，令我冇Miss到貨期，由衷佩服佢哋！」解決了貨量，另一問題又困擾Simon，「那時十部日系機九部要用『卡貼』解鎖，解完仲有『圈外』問題，即係隨時收唔番網絡，單是向客人解釋已花費唔少時間。最慘係客人有乜嘢事都會回頭『爆鑊』，到時又要免費幫佢哋拆解，嗰段日子認真難捱！」惟Simon表示，正因為他願意向客人解釋清楚，才建立了口碑，多了一班熟客。

為開拓客源，新舖近期兼售Candies等特色機殼。	產品只要有市場，Simon都有興趣，最近便賣埋PS Vita。	日本Sharp曾出過多達24隻顏色的Pantone 812SH，Simon全部引入。

港人愛摺機 開設潮店

現在iPhone盛行，每逢有新一代推出，連日韓大廠都要讓路，對日系機可有影響？「我們客路不同，而且日系機沒有旺淡季之分，只要款靚功能強，就有捧場客。」Simon指出，不少香港人愛買摺機，而傳統日系機正是這個模樣；至於顏色則以銀灰等中性顏色最好賣，「太女仔或印滿公仔嗰啲，可能姣得滯，港女反而唔Buy。」為開拓客源，Simon近年不但引入RASTABANANA及Elago等潮牌手機殼，去年底更於銅鑼灣開設樓上新舖︰「先達冇錯係人流多、位置好，但實在太過擠擁，加上龍蛇混雜，斯文客同OL都唔鍾意上嚟。依家開喺銅鑼灣，就係希望吸納中產新客人！」採訪所見，新舖佔地過千呎，不但比一般先達「舖仔」闊落得多，其木地板配襯紅白色裝潢，簡約風格猶如原宿潮店一樣，瀛！

瀛Phone第一人

叫得做先達瀛Phone第一人，Simon當然有唔少過人之處，除了早於2006年首賣日系手機，搶食頭啖湯，更是日系機解鎖先驅，最近仲開埋日系手機潮店，勁有諗頭！

撰文︰陳志滔 部分攝影︰梁偉德