上樓！尋媽媽的味道

另類「家訪」

第一次到訪「無極俱樂部」，差點以為「誤闖民居」！一張長長的餐桌、小酒吧，還有客廳，廳中有梳化、茶几、地氈、書櫃、牆上裝飾和大大的吊燈，還有一個開放式廚房，格局好屋企。老闆羅先生和Wako都是設計師出身，一手包辦室內設計；開店一心想以媽媽料理為主，乾脆將餐廳變成「家」的模樣，每個角落都放足心思，比大餐廳刻意營造的屋企Feel更真實自然。羅先生說：「我們希望大家在此吃飯，然後坐在客廳飲杯咖啡聊聊天，度過一個愉快的晚上，如在家般自在。」

日本媽媽主理

話明主打媽媽料理，所以這裏沒有壽司刺身、天婦羅和鐵板燒，只有日本人的家常菜，以煮物居多，醃蔬菜、煮雞、燉牛肉等，由擁有多年入廚經驗的日本媽媽Wako負責，啖啖食到日本家庭風味。餐牌上每一道菜都是Wako喜歡的料理，原來她小時候會趁着媽媽煮飯時偷師，每逢放假又會去家裏開的餐廳幫手，久而久之，廚藝慢慢進步，到今天自立門戶開設小餐廳。每次來，都會見她在Open Kitchen中為客人即席下廚，陣陣香味傳來，真像在家中等開飯一樣！Wako坦言打理餐廳很辛苦，不過當聽到客人大讚好味時，再累也值得咁話。

雞肉菜忌廉燉 $88 日本媽媽多以咖喱或忌廉煮燉菜，可以撈飯食；這裏就供應麵包，蘸濃稠忌廉汁，好香甜滋味！	魚西京燒 $99 西京是麵豉的一種，味道帶甜。先將麵豉塗在魚身上再燒，外層甘香脆卜卜，內裏甜甜哋帶鮮味。	日式一口牛柳粒配馬鈴薯　$155 以紅酒醃牛柳，再以橄欖油煎熟，牛柳粒肉味濃郁鬆化又Juicy，與牛油薯蓉好夾。

均衡營養

今晚食乜餸？同屋企一樣，天天不同。皆因Wako每天都會到中環街市入貨，只選新鮮而靚的材料，希望大家能夠食得健康。她有感香港人外出多吃肉，少吃菜，於是特地設計有肉有菜的料理，煮牛柳粒會配薯蓉，燉菜又會加紅蘿蔔及洋葱，煮魷魚則配芋頭和蘿蔔等，營養均衡得來，口感味道亦好豐富。雖然是一個小小動作，卻像媽媽關注家人健康一樣，令人感到窩心。

店子暫時不供應酒水，預計1月中會取得酒牌，到時食完飯可以同老友齊齊摸酒杯底。	魷魚芋頭煮 $88 顏色不鮮艷卻好味道，以海帶及木魚湯煮芋頭及魷魚，芋頭味重，盡吸鮮甜味道。	「客廳」有3張大梳化，好舒服； 食飽飽之後可以叫杯咖啡慢慢坐。

烹調都好Homefeel，雖然菜式賣相有點粗疏，但Wako卻落足心機，就連最基本的忌廉也是自己以牛油、鮮奶及忌廉等調校，食落特別濃滑Creamy，蘸麵包食就最正。除了普通的午餐及晚餐外，這裏特設私房菜，只要預早3天訂位即可，想感受正宗的日本媽媽味道？快些來「家訪」。

放大圖片	日式醃製蔬菜 $77 先以日本醋醃製青椒、紅椒、黃椒、冬菇等再炒香，上桌時熱辣辣，酸酸甜甜，像個暖沙律。

REVIEW

環境氣氛：★★★★（以5★為滿分）

好味指數：★★★

必食推介： 日式醃製蔬菜、日式一口牛柳粒配馬鈴薯、雞肉菜忌廉燉

人均消費：$200

地址：上環蘇杭街100~102號江寧大廈3樓（星期日休息）

查詢電話：3525 1520

撰文：蘇瑞霖

攝影：張群生