Hisense 55吋3D TV 娛樂一睇化

市面流行的主動式快門3D TV，雖然可用盡1,080p解像度，但需要配合眼鏡高速開關快門來營造3D立體感，容易睇到眼花。Hisense為此在最新55吋3D電視LTDN55XT710HK3D，引進3D-SOC影像處理技術，配合120Hz不閃式面板，能有效減少閃爍；另支援Wi-Fi上網，能直接睇YouTube、玩facebook，更可連接無線鍵盤和滑鼠操控，輕鬆將屋企變為數碼家居。

LTDN55XT710HK3D 售價：$19,990（跟兩副3D眼鏡）

減閃爍保流暢

新一代3D-SOC影像處理技術的原理，是透過分析立體畫面的左右視差，再進行綜合運算，令兩者配合得更流暢自然，加上新一代主動式快門技術及120Hz不閃式面板，能有效減少閃爍、抖動及重影問題，就算長時間睇3D電影，都同樣順眼。同時針對隔住3D眼鏡睇戲時，畫面容易變暗的情況，新機將亮度提升至550流明，配合1,000,000:1對比度，影像明亮清晰之餘，暗位層次感仍細膩分明。

Wi-Fi瀏覽網頁

為提高兼容性，新機還支援以Android平台為基礎的網絡功能，可選擇以LAN線或Wi-Fi上網，再直接輸入網址瀏覽網頁，這樣便可於客廳隨時睇YouTube、優酷等短片，玩facebook、微博與朋友溝通，以及進入Yahoo!、Google搜尋資料；另備有大量應用程式供下載，網絡功能相當強。若嫌用遙控器打網址太麻煩的話，還可接駁無線鍵盤及滑鼠，簡單地輸入資料和揀選項，令電視遙身一變成為數碼娛樂中心。

將畫面3D化後，能因應片種調節視點及景深。

設有大量應用程式供下載，包括生活娛樂、聊天社區等類別。

Wi-Fi無線上網固然方便，但用家亦可接駁LAN線上網。

RMVB短片2D轉3D

不少年輕影音迷喜歡下載RMVB短片睇，但用電腦的芒仔欣賞始終有點辛苦，想在客廳一家大細齊齊睇的話，大可利用LTDN55XT710HK3D的USB插口。只要將USB儲存裝置插入機身，便可直讀RMVB短片檔案，仲可以玩埋2D轉3D功能，將RMVB短片全面立體化。而用家亦能利用這功能，將電視節目、DVD，甚至打機畫面3D化，唯一美中不足是2D轉3D不支援YouTube等網絡短片，但以$20,000有找的價錢，算是吸引。