Allegro M310 磚攻入門

近年智能手機的屏幕愈出愈大，HTC力推4.7吋的TITAN，Samsung的5.3吋GALAXY Note熱賣，一眾「巨無霸」睇片、上網舒適有餘，卻難為了一班女士們，手仔纖細些少都拎唔到嚟傾電話。反觀Acer新推出的 Allegro M310更加大眾化，3.6吋屏幕加上弧形機身設計，Size啱啱好；而且採用動態磚（Live Tiles）介面的Windows Phone 7.5系統，新年換新機諗得過！

售價：$2,798

3.6吋好手感

Windows Phone推出一年有多，但機款選擇其實都幾少，大部分以4吋巨芒為主，對於手細的女士們確實不便。Allegro M310相對輕巧得多，3.6吋屏幕屬現時最小巧的WP 7.5型號，機身尺寸與iPhone 4S相若，男女用家都可以單手揸住部機篤芒，操作更加就手。而新機在設計上亦與同廠Android手機Liquid系列有幾分相似，同樣採用流線型設計，機側以至機底位置都以弧形收邊，令機身厚度僅12.99mm的情況下，手感依然良好，長時間揸機上網都好舒服。

睇片飛走黑邊

新機主打便攜性，最啱一邊搭車一邊煲劇，雖然屏幕得3.6吋，但解像度達480×800，而且屏幕比例接近16:9，睇高清片時可以Full Screen去黑邊，觀感絕對不遜於一眾大芒機。美中不足是屏幕僅選用普通TFT面板，可視角及鮮艷度比AMOLED、SLCD差，不過考慮到機價$2,798，屬同級機款中最平，性價比相當吸引！值得一讚是新機的音效不俗，機底喇叭聲大又唔拆，聽歌、睇片幾好Feel！

機背用上塑膠物料，容易留下指模。

備有實體快門鍵，支援半按對焦。

順暢行WP 7.5

操控方面，新機預載WP 7.5系統，功能如多工處理、網絡共用等全部有齊，而且全面支援繁體中文，內置手寫、注音等輸入法，手寫的認字率仲幾高添！雖然新機屬平價款式，但它依然搭載1GHz處理器及512MB RAM，整體操作流暢。小記認為拖拉頁面、多點觸控的反應甚至比iPhone 4S更順！但要留意，機身鏡頭僅得500萬像素，而且冇內置閃光燈，縱然備有實體快門鍵及特效拍攝功能，影相質素亦難免被略略扣分。