PS Vita手提遊戲機上周五開賣，有成14隻護航遊戲同日推出，花多眼亂，玩家可能只集中在《塊魂No Vita》等大作之上。查實同日推出的《忍道2 散華》都製作得勁有誠意，畫面靚之餘，設有搞笑道具製造功能，兼且可對應PS Vita的「底、面」雙輕觸屏幕，一篤一捽便可鎖定目標出手裏劍，鍾情動作遊戲的玩家肯定Buy！
遊戲名為《忍道2 散華》，至於遊戲第1集到底大家又有冇印象？其實開發商05年才推出PS2版《忍道 戒》，06年再出PS2《忍道 匠》和PSP《忍道 焰》，蟄伏5年多先推出新一集，幕後主理的更係負責《侍道》、《天誅》系列的開發商Acquire，質素絕對唔成問題。故事延續上集，講日本室町時代發生「宇高多之亂」後，區內3大勢力再生動亂，玩家扮演主角「火祭之禪」，身處的忍者村被滅族，作為唯一生還者，目標自然係為族人報仇！
好聽啲主角係一個Freelancer，唔好聽就叫做「三頭蛇」，佢可以隨意接3大勢力的任務，不過有趣嘅係完成任務後，既可賺錢，亦會改變各勢力的軍事、兵糧等屬性，唔係一條主線玩到尾。任務亦唔係全部玩暗殺，亦要負責偵查、輸送、誘拐、救出等工作，如果完成到特定條件，更會有額外獎賞。遊戲仲加入不少有趣設計，可運用四肢撐起布幕，從高處滑翔避開地面守衞，或者利用素材組合唔同新道具，最搞笑係可以製作假壽司，呃敵人過嚟食再做低佢；想輕鬆集齊素材，各位大可利用PS Vita的Near功能，跟同區玩家交換。
忍者的精髓在於潛入，最高招係完全不被敵人發覺下解決對方，今集亦沿用「血祀殺法」機制，只要冇畀人發現下潛到敵人背後，趁頭頂出現閃光時，一篤畫面的「殺氣」Icon，便可一擊即殺，唔怕驚動到其他人。被圍攻時，主角更可以使用必殺技「斬刻」，發動後可以暫停時間畀你大開殺戒，不過發動時間有限，用完要重新儲「斬刻」能量計。新作當然亦對應到PS Vita主機的輕觸介面，機面輕觸屏幕主要畀玩家鎖定敵人、開啟地圖、揀道具等，機背就可作遠距離瞄準同狙擊敵人，睇準機會捽出手裏劍！
類 型：動作
開 發：Acquire
平 台：PS Vita
售 價：$388
查詢電話：2341 2356
撰文：布偉倫