揸坦克估歌仔Celebrate with Apps
聖誕開Party，梗係要搵啲節目開心一下，嫌玩桌上遊戲、睇應節電影太Old School的話，iPhone有各式各樣的玩樂Apps，有些趁住佳節臨近推出特別版，有些仲好似《Rover Wireless Spy Tank》咁出埋架遙控坦克，無論想買嚟玩交換禮物或招呼老友，都可以齊齊App住歡度聖誕！
派對必玩
《Rover Wireless Spy Tank》技術考驗
售價：免費（需另購遙控坦克）
這App由Brookstone推出，需要配合其遙控坦克才玩得到，玩家除了可利用iPhone控制佢駛前駛後，還可經坦克前方的監控鏡頭，實時睇到車前影像，遙控距離可達200呎。開Party時，大可在房間擺設不同障礙物砌出跑道，跟着輪流以iPhone篤芒操控，駕駛坦克抵達終點，比試一番！
《娜娜聲估歌仔之老外亂唱中文歌》搞笑猜歌名
售價：免費
食完大餐、交換完禮物，成晚流流長，當然要搵啲Game玩吓。這App內置多首由外國人亂唱的中文歌畀你估，十足「超級無敵估歌仔」咁玩，需要於100秒內估出歌名。最正係歌曲有廣東話和國語兩種，唔算太冷門，挑戰性適中。玩遊戲時最好將部iPhone駁住喇叭齊齊估，爆笑之餘，Party氣氛肯定夠High。
自娛最啱
《Bakery Story: Christmas》自製蛋糕
售價：免費
聖誕自然唔少得Xmas Cake，想焗番個蛋糕增添節日氣氛，最啱就係玩《Bakery Story》，開發商最近仲出埋聖誕特別版，玩家要經營一間蛋糕店，除了備有許多聖誕擺設畀你粉飾店面，還加入多款聖誕特色餐單，最吸引是可「Invite」好友「Visit」你的蛋糕店，趁住佳節同遠方好友傳情達意、送上祝福特別有Feel！
《Super Mega Worm Vs Santa》蟲蟲激鬥
售價：0.99美元（折約港幣$7.7）
雖然Icon有條蟲和聖誕老人，但唔好以為要控制聖誕老人打怪獸，今次玩家一反傳統扮蟲，平時人見人愛的聖誕老人、薑餅人等變晒追擊目標。介面採用經典的點陣格仔圖像，並設有3種遊戲模式，一共有15個關卡畀你挑戰，最終目標是「吃掉」騎住鹿車的聖誕老人，用來消磨時間最啱。
撰文、部分攝影：李潤康
查詢電話（產品）：2385 5188