星星冠冕 麥桂培 Star of Dim Sum

「笨即是精」

這位點心師傅，即使今年繼續穩奪星星冠冕，平日依然落手落腳做點心，也沒一朝得志、忘記自己的過去。他常常回想入行的光景：「當年入行是基於現實考慮。我10多歲從內地來港，學識不多，沒甚麼好選擇，做廚房雖然辛苦，但總算有門手藝傍身，唔怕搵唔到食。」

爸爸和伯父都是廚師，培哥反而跟舅父學做點心。「做點心一更過，凌晨3點開工，晏晝1點走得，但做廚師困身得多，後生仔總想周圍玩，唔願坐定定嘛。」培哥笑說。說來輕鬆，其實當年這小子都算坐得定，而且肯學肯做兼抵得諗，師傅們都願意傾囊相授。「笨即是精」，培哥嘴邊常掛着這「金句」，意思是做人不要怕蝕底，別人才會願意教願意幫忙，得益的最終是自己。

蜜味叉燒腸　$16 即拉腸粉皮薄帶米香，裹着惹味的叉燒餡，好好食。

香滑馬拉糕 $12 馬拉糕經過1天時間發酵再蒸，口感鬆軟，甜甜的帶蜜香。

傾盡積蓄創業

有手藝又積極，培哥不乏發展機會，還遇上不少恩師，像香港四季酒店中菜部行政總廚陳恩德，就是把他帶入星級酒店中菜廳的「貴人」。之後他當上點心部主管，更分享3星米芝蓮食府的榮譽。薪高糧準福利好，怎看都像「鐵飯碗」，但培哥心中卻另有想法：「做員工壓力大，落場放假都唔敢熄電話，怕出了岔子，日日都擔驚受怕。」適時金融海嘯殺到，培哥有感市道低迷舖租平，是創業的好時機，於是毅然離開這個Comfort Zone。

晶瑩鮮蝦餃　$21 以膠質重的印尼冰鮮蝦做餡料，味道鮮爽，外表薄薄的甚考功夫。	酥皮焗叉燒包　$15/3個 招牌點心，3間分店日賣近1,600客，非常誇張；一咬外層甜香鬆化，跟內裏滿滿的叉燒餡好夾，就知紅得有道理！	煎臘味蘿蔔糕 $12 蘿蔔糕用上5斤蘿蔔炮製，好足料，更以人手切條，口感更好。

「掙扎咗好耐！但太太好支持我，又見很多師兄弟自己創業都成功，畀我好大信心。我諗，如果當時唔趁後生試，今時今日未必會咁勇。」他找來多年兄弟、同是點心師傅的強哥拍住上，傾盡數10萬積蓄孤注一擲，於旺角廣華街起步。兩兄弟原先想開甜品店，最後還是決定做回老本行——點心！

深水埗添好運地方比旺角總店大，但仍經常排長龍，兼座無虛席；樓上更設貴賓房，可品嘗私房點心。	麥桂培	放大圖片

小店大堅持

平民食店大師傅，夠晒噱頭！結果店子一開業已擠滿人，短短10天已達到收支平衡，超乎想像！他說：「無諗過外界反應咁好，其實當時市道好淡靜好低迷，可能我個故事夠正面，畀到人鼓勵。但講到尾，成功都要靠天時地利人和。」

店子小，無裝修兼零招呼，卻「長開長爆」！我認為一切都有賴培哥對出品的堅持：點心就算人幾多都一律即叫即做，保證熱辣辣；唔一定用貴料，但食材一定要新鮮，仲要即日清。看！培哥堅持用膠質重的印尼冰鮮蝦做蝦餃、手剁新鮮豬肉做燒賣、蘿蔔糕的蘿蔔是手切的、馬拉糕要發酵24小時才蒸、腸粉即拉……店小小，足見大堅持。

接連開分店

小店奇迹一創再創，大收旺場之外，還始料不及摘下星星，成為當時最平價的米芝蓮餐廳，$12賣3個叉燒包，抵食度冠絕全球。對此培哥直言諗都無諗過：「我哋間舖咁細，又無豪裝，純靠食物取分，好開心！但亦都好驚訝！」一舉成名，旺角店已應接不暇，於是培哥在深水埗開分店。

最近店子更進軍中環區，環境升格，收費亦調整過，主攻外賣客，一出反應奇佳，招牌叉燒包日賣超過600客！就連世界名廚Alain Ducasse都慕名而來，培哥坦言受寵若驚。添好運的成功，不僅是一個師傅一登龍門的神話，更成了不少人的楷模，間接掀起點心店熱潮。這位過來人不忘其座右銘：「成功背後，一定要事事親力親為。」對！親力親為，是工作、做生意和奪星不二法門，大家共勉之。

麥桂培Profile

入行30多年，曾任職多間酒樓、酒家及酒店，以往曾為星級中菜廳龍景軒點心主管。2009年開設點心專門店「添好運」，不僅成為人龍店，更旋即摘下米芝蓮1星榮譽，分店愈開愈多。

撰文：楊淑英 攝影：張群生

地址：深水埗福榮街9~11號地下

查詢電話：2788 1226