倫敦直擊！Prada Phone by LG 3.0矜貴亮相

論時裝潮流，意大利、法國等歐洲品牌肯定是先驅，但今勻一眾時裝精的焦點卻集中於英國，皆因Prada與LG大搞Crossover，於倫敦發布第3代Prada Phone。外形沿用黑色高雅格調，卻於機背加入Prada經典的Saffiano皮革圖案，超Trendy之餘，配以雙核心處理器、4.3吋800nit高亮度靚芒等頂級規格，科技潮人必撐！

售價：待定（2012年1月推出）

Saffiano皮革圖案

Prada的手袋和銀包相信好多女士們都擁有，其中Saffiano可算是最長青的系列。來到第3代Prada Phone，整體設計依舊以黑色為主，配以黑灰色電鍍邊框，凸顯貴氣。而新機重點在於採用Saffiano皮革圖案，將布滿細紋的皮革融入背殼，手感相當特別，更不會留下指模及油漬，易於打理又夠Signature！雖然機背用上特別設計，但卻無損機身輕巧，厚度僅得8.5mm，加上圓邊機側，相當好揸手。不過要留意，與上兩代Prada Phone不同，新機並未附送Saffiano機套，專屬手機配件如藍芽耳機、連接底座等均需另購。

NOVA Plus超光屏幕

事隔3年兩大品牌再度合作，單憑外表當然不足夠，新機更搭載4.3吋NOVA Plus靚芒，技術屬同廠Optimus Black NOVA的升級版，亮度提升至800nit，遠遠拋離一眾AMOLED、Retina屏幕，其好處是擁有超強的抗反光能力，於太陽底下，屏幕都唔會因反光而矇查查，以後拎出街就唔使用手遮芒咁狼狽啦！唯一美中不足是4.3吋大芒的解像度只有800×400，一般睇片、睇相雖然冇乜大問題，但睇網頁細字時便未夠細緻，略為扣分。

新機與上代Prada Phone（上）同樣採用黑色設計，但屏幕增至4.3吋並減省鍵盤功能。

新機與上代Prada Phone（上）同樣採用黑色設計，但屏幕增至4.3吋並減省鍵盤功能。

機背用上專利Saffiano皮革圖案，唔講仲以為用緊Prada銀包！

介面功能與Optimus UI相似，最多支援7版主頁。

為4.0系統作準備

作為壓軸旗艦作，新機規格都用上頂級硬件，包括1GHz雙核心處理器、800萬像素鏡頭，更支援Wi-Fi Direct、NFC等嶄新功能，前者「Send相方便」，後者「一拍過料」，雖然這些功能在香港未算普及，但咁有前瞻性都好抵讚！軟件方面，採用名為P UI的Prada獨家介面，頁面變晒Monotone，連Apps的Icon都重新設計，圖案全以白色線條勾畫，令整體風格更統一。雖然新機暫時只預載Android 2.3系統，但廠商已表明日後可升級至Android 4.0，可以放心出機！