Kawaii小雲鳥山明動身力撐

最近小記清理雜物時,無意間發現幾本舊版《IQ博士》漫畫,勾起不少童年回憶。故事中小雲同小吉的可愛造型,廿幾年來Hit足老中青三代,仲同不少產品Crossover,最近港產Action Toys便與集英社合作,推出EX合金可動版小雲,手工精細到可擺出「篤便便」場面。而原作鳥山明更化身合金Figure力撐,Kawaii得來都只係數百元有交易,今個聖誕搵禮物唔使左揀右揀喇!

小雲磁石換面

講起近年推出的小雲Figure,較有睇頭的要數CM's出品,雖然玩具配件多,但卻「全膠」炮製,手腳關節邊玩邊鬆,令人失望。今次EX合金就交足功課,全身骨架跟腳掌都用上Die-cast,墜手之餘能確保頭大身細的設計能穩固站立。最吸引是小雲可以磁石換面,拆走劉海即可換「O嘴」Look,仲可以戴埋眼鏡和Cap帽。當然,卡通最經典的「篤便便」亦能換件重現,加上手腳多重關節設計,要小雲跳跳紮都冇難度!

布製服飾手工好

舊式搪膠Figure,服飾多數只靠塗裝了事,但今次合金版小雲的桃紅短袖Tee、藍色工人褲,竟然全部以織布車工製造,縫合線位更沒有爆口出現,認真細心。然而部分人睇到實物後,或會覺得合金小雲的Body偏高,而且表情配件較少,令耐玩性打了折扣,好在隨盒額外附送小吉,肥嘟嘟身形以堅硬ABS材質製造,觸角改以PVC增加柔軟度,整體雕工細緻,像真度十足,相當吸引。

鳥山明發條出聲

同期另有間中出來搞Gag的原作鳥山明機械人登場,主體骨架、下盤、雙腳全部以Die-cast製作,確保火柴腳有絕佳的接地性。較頂癮的是背脊加入發條Gimmick,扭動發條時會有「嘶嘶」齒輪聲,同時會反方向轉動,雖說佢唔識自動步行,但廠方加入大量關節提升可動性,例如髖關節可前後左右移動、腳踝Ball Joint可令腳掌全方位屈曲等,仲送埋支墨水筆,擺出畫嘢甫士更加搞鬼!

(C)Akira Toriyama/Shueisha,Toei Animation

撰文:廖俊斌 攝影:黎劍華

查詢電話:2390 9843