高人一等 Chocolate Tea Time

鹹不及甜

去Café 103，我認為Tea Time最適合！因為午後時段會有「經典朱古力下午茶套餐」供應，啱晒朱古力粉絲。有別於一般傳統英式下午茶，用來盛載點心的不是「3層架」，只見侍應端來一本巨型木製書本，打開書的封套，竟是個迷你木架，好神奇！分上、中、下3層，十分骨子，擺放着10款精緻美點，其中3款是鹹點；一口氣食勻多款點心，總結：甜的比鹹的好！這裏所用的朱古力是法國名牌Valrhona，多款甜品分別以35%至80%不同可可濃度的黑、白朱古力炮製，能吃出層次變化，不一味得個甜字。鹹點則平平無奇，三文治包點質感較乾，有待改善。

必飲！特濃熱朱古力

吃茶點，喝甚麼？這裏最著名的麗思卡爾頓熱朱古力網上人人大讚，令我滿心期待。熱朱古力屬於下午茶精點飲品之一，看似簡單，飲落非常滑口，全因它以朱古力醬沖製，質感濃稠挺身夠張力，口感很Rich，朱古力味亦夠濃。不過宜慢慢飲，因為會愈飲愈膩！

經典朱古力下午茶套餐（包茶、咖啡或熱朱古力1杯）$248/位 ，$488/2位

麗思卡爾頓熱朱古力

有新意！朱古力拿破崙酥

傳統拿破崙以鮮果配酥皮炮製，Café下午茶主打朱古力，所以拿破崙酥亦是朱古力版本，沒有酥皮蹤迹。創新以朱古力層層疊，底層是Brownie，上面有朱古力薄脆、朱古力慕絲和朱古力忌廉，頂層鋪上一片朱古力薄片，外形精緻，脆滑口感層次好豐富。雖然底部Brownie食落較乾，但與濕腍慕絲配搭剛好，都算Match！

環境：居高臨下

Café有設計，但沒啥驚喜；有80個座位，枱與枱之間位置闊落，而且有不少梳化位，食客私人空間足夠；客人們都細聲講細聲笑，環境十分寧靜，感覺舒服。最煞食是落地大玻璃，在103樓能居高臨下欣賞維港景色，堪稱全城最High下午茶！

放大圖片

放大圖片

服務：不設訂座

Café 103無得訂位，而且本地客人和遊客俱多，惟有早兩小時排隊留位，好誇張！入座後多位侍應先後前來落單，雖然不免有催促感覺，但他們會主動介紹下午茶各小食，對於招牌熱朱古力的材料和朱古力味道也瞭如指掌，並樂意詳細地講解，讚！

總評分：B+

撰文、攝影：陳穎雯

地址：尖沙咀柯士甸道西1號環球貿易廣場The Ritz-Carlton 103樓

查詢電話：2263 2270