趁PS Vita下星期六於日本率先開賣前，任天堂將會動用埋今年手頭上最後一張N3DS王牌《Monster Hunter 3（Tri-）G》，這可說是今年日本Game壇最大型作品，建基於Wii《Monster Hunter 3》的手提版，主打魔物碎龍布拉基迪歐斯夠晒霸氣，亦同《MH3》一樣可以落水戰水龍，配合N3DS輕觸玩法確實幾有新鮮感。但今次在冇行貨返的情況下，大家預咗要捱炒價入貨！
今年年中N3DS大幅減價加上大作接連推出後，在日本方面的形勢即時扭轉，加上年尾藉住《Mario Kart 7》同《Monster Hunter 3（Tri-）G》兩大巨作，應該可以大幅帶動主機銷量。跟PSP版本唔同，N3DS要靠右方四粒功能鍵轉視點都幾有難度，Capcom為此推出設有右Analog掣的擴充座，賺多一筆。不過N3DS雙畫面設計都有獨特用處，下畫面可以用來顯示相關資訊，並可個人化地將地圖、特殊功能或唔同道具放在6格位置上，一篤即用唔使慢慢揀。
今集主打的新魔物係封面的碎龍布拉基迪歐斯，頭頂有凸起的頭冠及一如暴龍以後腳行走。而最難搞係牠雙手附有具爆炸性的綠色黏菌，除了會扣你好多血外，黏菌跌在地上一段時間後更會如地雷爆炸，都幾難兼顧。今次亦有水龍現身，玩家要潛入水中狩獵行動異常迅速的加諾托托斯。此外，新登場的還有擅長尾巴攻擊的櫻火龍利奧雷亞及於空中迅速攻擊獵物的蒼火龍利奧雷烏斯。但今集魔物都較「人性化」，體力耗盡會顯露疲態，要去捕食同休息，唔係獨沽一味見人就殺。
新作同樣設有單人跟最多4人的Local連線協力玩法。單人玩法據點為摩加村，在這裏會遇上兩位造型有趣的奇面族幫手茶茶和卡楊巴，他們會跳舞幫助角色狩獵，而且會佩戴特別面具提升能力，例如可點火的油燈面具、可幫玩家烤肉的烤肉面具，Cutie程度不下於艾路貓。至於多人任務據點位於丹治亞港，會提供唔同任務，由最低級到神級的G級任務都有。要應付神級任務，當然要先強化武器裝備，例如用「解除限制器」將弓槍改造，提升彈藥數量及攻擊力。
類型：動作
開發：Capcom
平台：N3DS
推出日期：12月10日
售價：約$600
查詢電話：2359 7998
撰文：布偉倫