Kindle Fire閱級挑戰

eBook在香港掀唔起熱潮，很大程度是因為閱讀習慣和Tablet崛起。作為eBook的先頭部隊，Amazon當然要迎合潮流，將電子書閱讀器Kindle大革新，當中Kindle Fire便改玩Android系統，配以7吋彩芒，不但有龐大的電子書庫撐腰，仲可以煲劇、睇片，兼玩埋「憤怒鳥」、「面書」Apps，功能勁過唔少平板電腦，最重要是只賣$2,580，抵玩！

Kindle Fire 售價：$2,580

彩芒夠細緻

由第一代Kindle開始，Amazon電子書均採用E Ink，雖然畫面似足油墨，但黑白圖片效果始終差一截。Kindle Fire正式改玩彩芒，採用7吋1,600萬色IPS屏幕，反應及對比度不俗之餘，像素密度更達169ppi，就算睇書都唔會矇查查！惟要留意，機身採用一體式設計，內置8GB記憶體只夠擺幾套影片；幸好支援Cloud Storage，可以將檔案擺上雲端。

改頭換臉煲劇

新機改用Android系統，廠商更特意設計出自家UI，其設計與webOS有點相似，將程式以圖示Cover Flow形式顯示於中央。而最強的地方是支援Kindle Store，提供1,700萬首MP3的「Music」及逾10萬套電影和電視劇的「Video」等，內容又齊又新，以「Video」為例，已經有不同Seasons的《LOST》下載，包保唔會脫節。

採用一體成形機背，防滑紮實。

開關鍵置於機底，而充電要用microUSB。

機身隱藏迷你喇叭，音效不俗。

睇書玩Apps

作為電子書閱讀器，新機備有過千萬本電子書供下載，包括80萬本9.99美元或以下的書籍，睇書時仲支援Highlight、字典、註腳及字體更換等。睇到悶悶哋，可以玩埋Apps及Web，前者有《Angry Birds》等大熱遊戲；後者則內置Amazon Silk瀏覽器，小記試上ontv時覺得速度相當快，消磨時間一流。雖然Kindle Fire唔接受非美國地區訂購，只能從「水」路到港，但網上買書、買Apps等都一律成功，即係香港都用到！