18倍長炮 WB750廣究玩味

有時相機好似人一樣，講究包裝和賣相，最好高格調之餘再加點噱頭，贏取快拍王、夜攝王等美名，但如果用上手才發現廣角唔夠Wide，Zoom極又唔到目標，真係幾冇癮！Samsung最近發布的WB750便集各家所長，既擁有濾鏡和拍片等趣味功能，亦具備24~432mm 18倍變焦鏡頭，加上機身只重194g，最啱放於口袋隨時抓拍！

選用Schneider 24~432mm長炮，廣角遠攝都掂。售價：待定

超Wide！24mm鏡頭

要打造巿面最小巧的18倍變焦長炮，廠方當然嚴陣以待，特別找來老拍檔Schneider為WB750製造24~432mm鏡頭，24mm廣角端影風景自然比傳統28mm或35mm機款更有氣勢；遠攝時還可配合Dual IS雙重防手震功能，以及Smart Zoom技術將變焦提升至24倍，捕捉遠處景物更輕而易舉。加上新機備有A/S/M手動拍攝模式，透過機背轉盤即可調校光圈快門，而且屏幕能實時顯現曝光效果，一睇就知有冇Over或Under曝光。

方便！拼製相片MV　

拍攝咗一堆相片和短片，回家剪輯後製有時都幾花時間，為此，新機醒目地加入Creative Movie Maker「創意影片製作功能」，毋須經過電腦，已能將相片及短片作自選剪輯，並可加入不同主題特效和音樂，儲存成獨立影片檔案，自製MV絕冇難度。此外，為免用家於短片及相片拍攝時難以取捨，特別引入Dual Capture功能，在1,080p全高清攝錄時，仍可拍出6張1,000萬像素相片，滿足大家要「相」又要「片」的願望。

機背備有獨立拍片鍵和轉盤。

模式轉盤上特地增設「創意影片製作功能」。

閃光燈置於鏡頭右方，使用時小心被手指遮住。

好玩！重疊濾鏡效果

除了強化短片和相片拍攝外，廠方亦不忘於濾鏡功能下苦功，加入自家的「智能濾鏡3.0」，P Mode時只要按下「Fn」鍵，即可揀選油畫、針孔和模型等數碼特效；另可拍攝後於Play Mode按「Menu」鍵作後期加工，而且可以無限重疊濾鏡，大玩Crossover特效！最吸引是新機有埋流行的3D及2D全景拍攝，以及可於場景模式內，點選趣味相框功能，拍攝玩意真係多到玩唔晒！