COOLPIX S1200pj 60吋Phone投疐

整合投影功能的Nikon pj系列數碼相機，不經不覺已推出至第3代，以前內置Projector頂多只能投影DC照片，想與好友分享iPhone或其他裝置的靚相就未必做到。幸好新一代S1200pj緊貼潮流兼容iPhone及iPad，毋須再經電腦過相，便可直接投影60吋畫面，加上iPhone 4S容量可達64GB，播放全部相片隨時一日一夜都睇唔晒！

售價：$3,880

直駁iPhone播相

點解S1200pj可以播放iPhone相片咁得意？原來它跟機附送一條Belkin iPhone及iPad專用接駁線，只要連接相機右側的投影機插口，再於手機選項設定中揀PAL電視訊號，便可直播《YouTube》App的串流影片及《照片》App內的心水相片，而後者於播放時更可選擇方塊、漣漪和融合等不同過場效果，以及匯入手機內的音樂作陪襯，睇相自然更賞心悅目。

60吋屏幕享受

投影方面，新機特地於投影鏡頭加設推蓋，可以保護鏡頭之餘，亦可做到一推開機，毋須次次撳掣咁麻煩！加上，機身最短投影距離只需26cm，配合20流明亮度和200:1對比度，只需將室內光線調暗，便可睇到清晰影像。如想多人分享的話，此機只需3.1m已可投影出60吋影像，隨時感受大屏幕的震撼。此外，用家只要預先在電腦安裝《PC-PJ Transfer》軟件，便可播放電腦內的多媒體檔案，一機多用。

投影機部分採用推蓋式設計，一推即可進入投影模式。

底部可揭起令機身微微昂後，投影時不怕被雜物遮擋。

後製發揮創意

作為一部DC，影相功能當然不可少，新機選用1,410萬像素CCD，配合EXPEED C2影像處理器和3吋屏幕，規格絕不馬虎。惟此機玩味拍攝功能不算多，只有柔和及高色調等6種濾鏡；幸好拍攝時備有18種場景模式，影完相於Play Mode內，還可加入多種後製效果，如魚眼、模型，以及針對人像的「魅力修飾」功能，可做到美肌白滑效果，要影靚相話咁易！