近期的新遊戲多得離譜，每星期都平均有2、3隻大作見街，只恨好Games太多，時間太少。繼早前的《Battlefield 3》後，另一打住「第3集」名號的射擊大作《Call of Duty: Modern Warfare 3》今日正式開賣。新作加入Survival Mode及強化線上對戰模式，殺敵過關變化多，而且調整咗平衡度，連線時少咗機會畀人用勁槍屈機！
近期很多玩家將《Call of Duty: Modern Warfare 3》跟《Battlefield 3》互相比較，但要比高低確實唔易，至少前者有兩集故事作後盾，而後者屬新故事新引擎。《Call of Duty: Modern Warfare 3》延續第二集故事，玩家繼續扮演美軍Delta Force和英軍SAS特種部隊，經歷上集大戰後，成員在印度休養期間忽然被俄軍伏擊，又要繼續打打殺殺，戰事仲波及紐約、柏林、巴黎、倫敦、杜拜等大城市，迎合到一眾鍾意打城市巷戰的粉絲！
故事性唔弱，戰鬥畫面更趨激烈，好似今年E3遊戲展時，就揀咗一段在海底潛行炸毀敵方潛艇的Demo，再乘快艇於敵方軍艦穿梭駁火，逼力十足，速度感加畫面更屬頂級水準。最吸引是無論單機或連線遊戲模式，都夠紮實和好玩，就以單機模式為例，今集可以玩到Spec Ops挑戰模式，在指定條件下挑戰特定任務，另外仲新增Survival Mode，玩法介乎《Call of Duty: Black Ops》喪屍模式同《Gears of War》的Horde Mode之間，每一波來襲嘅敵人愈變愈強，而且敵人出現的位置，更會因應玩家狀態而變化，留得住條命仔之餘，仲要拚命搶錢買裝備。
對戰模式係《Call of Duty》系列的強項，今集連線對戰在基本Deathmatch、Domination同Headquarters外，還加入殺人後要搶到敵人軍牌先至算數的Kill Confirmed，並有每殺一個對手後升級槍械的Gun Game模式等，玩極都唔會悶。對戰模式多之外，對戰時的獎勵系統更得到強化，今集將Killstreak獎賞分為Assault、Support同Specialist三類，儲到連殺Killstreak後，可因應環境召喚攻擊類、支援類的工具，亦能夠儲到槍械附加裝置Perks，可以提升槍械的瞄準穩定性及減低後座力等。不過開發小組唔想太多玩家一味靠捕靚位加大火力Perks「屈機」，特別減少咗好多加強火力Perks，希望玩家善用不同Perks組合去殺敵，平衡度算係調整得唔錯。
類 型：射擊
開 發：Infinity Ward、Activison
平 台：Xbox 360、PS3
推出日期：已推出
售 價：$399
查詢電話：2359 7998
戴副型超會唔會打得叻啲？今次廠方同眼鏡品牌Gunnar合作，推出配上蔡司鏡片加鎂合金鏡架的遊戲眼鏡，戴住打會睇得清楚同冇咁易攰喎，早前外國試玩會上，都有畀專業機迷試過。
撰文：布偉倫