F-01D體感翻頁防水平板

近期日系平板突然冒起，除了Sony公布的Tablet S系列外，DoCoMo及Fujitsu亦合作推出ARROWS Tab F-01D，將10.1吋巨芒、LTE技術及防水功能融為一體，最正仲支援體感操作，只要在鏡頭前Fing吓手便可隔空翻頁，上網時好似Xbox Kinect咁好玩！

售價︰$5,380
採用最新Android 3.2系統加上防水機身。

輕薄不怕水

防水手機大家就見得多，但防水平板卻遲遲未面世，不是沒有市場，而是要達到防水效果，平板電腦無可避免要做到又重又厚，屆時便失去流動應用的意義。F-01D最大賣點是加入防水機殼、防水膠邊之後，仍能把機身厚度維持在11.3mm，比很多智能手機還要纖薄，而且重量亦不過597g，仲輕過iPad 2！此外，它符合IPX7防水標準，保證在水深1米下，仍能正常運作30分鐘，莫講話落雨唔怕水滴，浸泡泡浴時都可帶埋去煲韓劇！

充電位有防水蓋保護，玩水時別手多打開呀！

記憶卡及SIM卡槽設於機側，更換時毋須拆電。

厚度得11.3mm，薄過打直的兩毫硬幣少少。

Fing手翻頁

家庭主婦是新機的目標客戶之一，因為機身除了防水，還支援體感操作，至啱阿媽一邊上網睇食譜，一邊煮番幾味。操作方法跟玩Kinect差不多，只要在前置鏡頭60cm距離內向左右Fing吓手，即可左右轉換頁面，或者跳前跳後網頁；若開啟其DLNA多媒體網絡功能接駁電視，更可以用埋嚟轉台及控制音量！小記實測所見，網頁真的對應手勢來跳轉，只是每次都有數秒Delay，唔算太流暢；而且用家還要確認現場沒有強光直射機面，否則靈敏度會受影響。

純白機背好簡約，不過鏡頭冇補光燈就差啲！

DoCoMo Market會定期推介Apps，可得閒上去「無料」下載。

冇鎖直讀SIM

跟好多頂級Tablet一樣，新機採用1GHz處理器及10.1吋巨芒，解像度達1,280×800，睇戲唔怕有黑邊出現。系統則屬最新Android 3.2，雖然首頁僅得5版，但介面卻比公版進步，例如提供了「防水」、「兒童」等6個布景主題，又預載大量東瀛扮靚Apps如《Hot Pepper》等，整體比公版機豐富得多。另外，一如其他DoCoMo出品，它並沒有SIM Lock限制，換句話說，插入香港SIM卡毋須解鎖即可使用；惟注意它用的是microSIM卡，而且LTE跟香港制式不符，用唔盡其「單撈」速度。