Siri九唔搭八 iPhone 4S大跌價！

號稱「iPhone for Steve」的iPhone 4S經水路抵港短短幾日，16GB版由最初炒價高達$13,000，未夠5天已回落至$8,800，跌幅逾30%之多，感覺的確變得抵買。然而，實際測試其Siri語音功能，以港式英語發問，答案卻是九唔搭八，加上打機、上網只係快少少，舊用家還是升級iOS 5好過！

炒價︰$8,800（16GB）$9,800（32GB）$11,800（64GB）

炒價跌三成

iPhone 4S水貨開賣為全城熱話，64GB版抵港時更曾炒上$16,000癲價；但隨着英、德、法等水貨到港，加上大批散客放機，至昨日截稿為止，16GB、32GB及64GB版的售價已分別回落至$8,800、$9,800及$11,800水平，跌了30%以上。回收價亦好不了多少，16GB版由高峰期$10,000跌至$7,500一部。不過若以機價成本約$6,000計算，現時放機仍有千幾元執；此外，不少用家趁機買番白色iPhone 4，令回收價不跌反升至$5,100左右。

答案啼笑皆非

說完炒價走勢，講番iPhone 4S功能。新機最大賣點是內置Siri語音功能，猶如有私人秘書伴身旁，只要出句聲，即可撥號、發SMS、查天氣或改行事曆，例如說「Tell人物＋事件」，系統會自動輸入短訊。不過基於它暫時僅對應英、法、德文，若用港式英語發問，答案便令人啼笑皆非，例如說「Android」，它會以為問「Enjoy」；問「Where is Steve Jobs?」，它會把「Jobs」誤當成「Jokes」，還說自己沒有笑話，真係得啖笑！幸好官方已公布明年會支援中、日、韓等語言，大家快些練定普通話啦！

iPhone 4S外觀跟iPhone 4沒太大分別。

SIM卡槽位置相同，但4S（上）近機頂位置多了一條天線。

影相更定更靚

iPhone 4S另一亮點是強化硬件規格，例如改用iPad 2的A5雙核心處理器，號稱速度快2倍、圖像處理快7倍。奈何目前未有任何Apps或Games對應雙核心，因此實際應用時進步相當少，無論開ontv網頁、播放YouTube等，速度都差唔多，令人失望。驚喜的反而在拍攝方面，不但畫質「升呢」到800萬像素，還增加人面對焦、除紅眼等進階功能，加上現在音量鍵可充當快門掣，配合f/2.4大光圈，影相更穩定。