何國鉦有口才冇性格
03年在港展出首個時裝騷的時裝設計師Dorian Ho（何國鉦），有人將他與當時得令的設計師鄭兆良相提並論，一舉成名後，即備受名媛女星追捧。讚美聲多，批評聲亦不少，有人批評他口才好，似公關不似設計師，他亦承認自己沒有設計師的個性。
Dorian常說：「設計唔難，同客人相處溝通最難。」他說自己跟其他設計師不同，因為他擁有一張能言善辯的好嘴巴，很多設計師性格內向及怕醜，不擅長與客人溝通，而他則擅長與人打開話題。他更大爆自己公司的男同事都是典型的設計師性格，因設計師性格致出事：「公司有三個男仔先後患抑鬱病要睇精神科，我畀壓力固之然有，但最大的原因係佢哋唔識得處理壓力，呢行特別多男仔，佢哋性格大部分好優柔，好怕醜，唔剛強，當遇到問題唔識得處理，好多男仔自尊心強，遇到挫折唔好意思同人講，收收埋埋，反而呢方面女仔會堅強啲。」
從不鬧客人
他知道有些設計師會發脾氣鬧客人，甚至趕客走，他自問從來未試過鬧客人，只會有技巧地叫人離開，遇過一些惡客，也只會說「今次未必幫到你」或是「今次時間唔夠」等藉口以作拒絕。記得04年曾遇過一位惡客，對方是一位香港名媛，向來作中性打扮，Dorian說當知道她找自己做衫時，也嚇了一跳，明知道她不適合自己華麗優雅的設計路線：「不過佢好友善，好隨和，大家第一次傾得好開心，第二次見佢，佢帶埋個朋友嚟，朋友睇完個試版，就不停鬧我話：『呢啲衫點可以畀佢着！』就算喺呢個情況，我都冇發脾氣，連助手都話我點解可以唔出聲。」因為他一直堅持客人永遠是對的的道理。事後他還親自致電對方秘書，表示是次不能幫她做衫，並把訂金一併退回。他認為度身訂造服務，需要顧及客人要求，因為客人付錢買的是設計師的服務，他覺得對客人是要遷就，但亦要平衡，如果只一面聽取客人的要求，便會失去自己風格。不過他亦有底線，如有客拿着布給他做衫，他一定會拒絕，會叫客人不如找裁縫吧！
Dorian在社交界甚為吃得開，獲很多名太愛錫，他的客路廣，名媛明星都有，如徐子淇、賭王三太陳婉珍、周慧敏、林憶蓮、鄭裕玲、林志玲、大Ｓ徐熙媛等都是他的客人，不過他多人讚，是非亦多。
欣賞鄭兆良
有人批評他不像設計師，批評他的設計，其實是由其他人代勞，指他只是一位時裝品牌的老闆，他解釋：「時裝品牌老闆只係生意人，唔識設計，如果設計師離開會影響成個系列，但我唔同，我識設計，只係有唔同設計師幫我做嘢，最後批核都係我，我先係系列嘅靈魂。」他知道他的作風，未必為人認同：「好多人未必認同我，覺得我好PR，但我唔介意。」
03年回流返香港舉行首個時裝發布會，展出《黑天鵝》晚裝系列，踏出香港的第一步，這個騷讓他成功在香港闖出一片天。他說：「時裝騷由當時最紅嘅名模陳嘉容、李嘉慧、楊崢和Rosemary行騷，發布會之後開始多人識，之後有人將我同鄭兆良作比較。」更傳出他倆不和的消息，他重申與鄭兆良一向是好朋友：「我同佢曾經一齊做過TDC騷，不嬲好friend，直至03年我出騷後，因為大家走嘅路線相近，有啲傳媒將我同佢作比較，仲講到我搶佢嘅客，雖然大家冇面對面講過呢件事，但大家確係有啲尷尬，但唔係外面講到關係咁差。講真佢係好有大將之風，否則唔會咁受歡迎，佢嘅衫好靚，我好欣賞佢。」
自己救自己
他說不怕外間的流言蜚語，可能因為自小就很獨立，年少時到美國留學的經歷，令他練出打不死的精神來。
他說：「15歲讀中三那年，我去咗佛羅里達州留學做交換生，要寄人籬下，要住喺人哋屋企，啲人以為我好開心，但其實唔係。」第一個接待家庭是一對年輕夫婦，兩人都是廿幾歲，有一對分別２及４歲的仔女，他心想同對夫婦年紀相若，正心生高興，誰知這是噩夢的開始：「原來呢對夫婦只係想搵人幫佢哋湊仔，我日日要湊仔，每日都只得熱狗和漢堡包食，嗰時未夠18歲，冇個人戶口，佢哋竟然動用我戶口嘅錢，私自攞晒我啲錢，估唔到佢哋係我最信任嘅人，出賣我，最慘我打電話通知香港嘅屋企人，我Daddy反而唔信我，原來對夫婦比我早打電話去屋企投訴，話我曳，要踢我走，嗰一刻醒晒，點解啲人會咁。」在他最無助的一刻，他作了一個決定，既然冇人救他，他發覺要自己救自己，即致電到當地交換生的總部求救，兩日後，總部派遣私人飛機接他走，這件事後，令他明白到，沒有解決不到的問題。
經歷改性格
不過噩夢還未完，第二個接待家庭，成為他的第二個鍛煉。這個接待家庭只有一位德國寡婦，知道對方沒有小孩，他當時還高興不已，心想：「今次唔使湊仔了。」該位寡婦亦很關心他，兩人關係很好，Dorian還稱呼她做「媽咪」，不過噩夢是來自寡婦的日籍軍人男友，他說：「記得當日係萬聖節，我返屋企見到媽咪喺度喊，佢話佢男友用槍指住佢個頭話要殺死佢，原因係妒忌媽咪對我好，嗰晚我決定漏夜逃亡，去媽咪朋友屋企暫住。我喺度諗點解會咁？但諗深一層係一個好好的鍛煉，喺香港讀書唔會遇到呢啲事。」Dorian之後又轉到一對在當地居住的台灣老夫婦，終於遇上好家庭，但一年間轉了三個家庭，經歷令他改變性格，由好靜的怕醜仔，變成性格堅強的「打不死」。
都是子淇惹的禍？
當年徐子淇為大女兒擺兩晚百日宴，分別請何國鉦和鄭兆良為她設計母女裝，子淇在第一晚穿着了鄭兆良設計的粉紅色母女裝，而第二晚則穿着何國鉦的設計，外間便將兩晚的服飾作比較，因而傳出兩人不和，多年來的不和傳聞，至今仍然在微博翻炒。
名媛女星逐個數
周慧敏奄尖
「佢係好有主見，可以話好奄尖，佢好清楚自己着乜嘢衫最靚，所以唔輕易聽人意見，我都知好難改變佢，最印象難忘幫佢做結婚嗰套衫，衫身上有水晶及花形圖案，雪白色短身設計，不過得一個星期做，因為佢唔出得街，我要潛入佢屋企幫佢度身，都戥佢慘。」
鄭裕玲爽快
「未識佢之前，外邊好多聲音，話佢好孤寒，初時都有啲驚，但我哋真係一拍即合，佢個人好隨和，好爽快，鍾意就鍾意，唔係三心兩意嘅人，而且佢好錫我，成日送禮物畀我，送過iPhone和iPad，一啲都唔孤寒，要為佢平反。佢好肯試新嘢，做港男司儀着住嗰套桃紅色晚裝，設計一個閃石bra，證明佢好有膽識。」
陳婉珍和藹
「有次佢要出席一個慈善活動嚟搵我做衫，我幫佢做咗一件紅色晚裝，佢好和靄可親，對我建議都好接納。」
憶蓮有火花
「憶蓮同我一樣都係金牛座，兩個金牛座遇上，好有火花，幫佢演唱會做一件跳熱舞嘅舞衣，初稿都改咗五六次，佢好有主見，但我作為設計師有自己嘅堅持，可能大家都好主觀。」
採訪：梁翠儀