划艇爬繩網 北潭涌Fun享回憶

10:00am：划艇龍舟樣樣齊

唔講唔知，原來北潭涌營地被水包圍，所以除了細個玩的彈床和球類等陸上活動外，還提供划獨木舟和水上單車等，大多水上活動以兩人為單位，好讓大家遊玩時也有朋友作照應。嫌獨木舟唔夠特別的話，會方最近更引入兩條分別供14人划動的龍舟，考驗大家的合作精神，而且10月時間划艇沒有夏天般辛苦！

12:00nn：集體回憶爬繩網

記得以前樓下公園總有個鋼架或繩網陣，但現在繩網愈來愈少，叫人好不懷念。營地便為大家帶來兒時回憶，而且繩網款式有十多款，由最基本的獨木橋到5、6米高的繩橋和繩梯都有。如果是廿多人團體的話，更可挑戰難度，合作爬上約10米高的攀爬塔，對於只會打機玩facebook的新一代來說，是極好訓練。

四周滿布綠葉，泛舟河上心曠神怡。

營地內有龍舟玩，14人以上便可參加。

1:30pm：氣手槍扮Laughing哥

睇Laughing哥劇集時，少不免會見到些槍戰場面，大家是不是睇到有點手癢呢？唔想打War Game拎住大槍通山走，一心練吓眼界的話，營內最近加入咗氣手槍射擊活動，有導師示範和講解玩法，仲有高低不同的標靶可供射擊，讓大家一嘗做神槍手滋味。

細個成日鬥快爬到頂，依家有機會再玩。	備有十多款不同款式的繩網陣。	場地可供2人一齊玩，標靶遠近可以自己調校。

3:00pm：神箭手阿凡達上身

難得來到戶外，嫌氣手槍唔夠Wild？不如試吓射箭扮阿凡達啦！大家唔好睇小呢項活動，單係扣弦的姿勢便有多種，教練話最常見是地中海式三指扣弦法。首先兩腳要左右平衡張開至肩膀的闊度，重心置於兩腳中間，再以虎口握弓，搭箭時主羽和弦線成90度，是講求姿勢和定力的活動。

雖然氣手槍只有0.8J，但記得戴上保護眼罩。	睇到箭靶插滿箭，真係幾有滿足感！	現場另有學習開球的高爾夫球場地。

入門氣手槍夠真實

場地選用嘅氣手槍係現時飛虎隊所用的Glock 17，槍柄大小適中，無論男女都合用。加上20枚子彈的彈匣只售$5，抵玩！

拉弓射箭不但好玩，仲好有型！	小河旁邊有圖片介紹紅樹林生物，可先參閱再暢遊。	放大圖片

漫步紅樹林

玩咗成日，相信大家都想找個地方享受大自然，營地小河的另一邊與海岸連接，備有風光明美的紅樹林，水退的話可到河邊漫步，認識紅樹林各種生物如螃蟹等，好彩的話還可看到彈塗魚，再欣賞埋日落，夠晒寫意。

幾十元玩成日

營地除了備有以上活動，還可玩野外定向、彈床等，別以為收費實好貴，其實只需幾十元入營費，便可玩盡戶外或會所活動。當中日營備有導師從旁指導，視乎人數及天氣決定開放時間及種類，實唔怕悶。

交通：西貢市中心轉乘94號巴士或9號專線小巴至北潭涌度假營下車。

車費： $6.1（94號巴士）、$5.5（9號專線小巴）

撰文：李家俊

攝影：謝孝祥

模特兒：Irene Hui、Kiyo