DEV-5變種望遠鏡攝位影3D

別以為一身叢林探險裝束的模特兒手上，只係拎住個望遠鏡，實情係一部數碼攝錄機，仲要係3D嗰隻！這部由Sony出品的全球首部全高清3D DV望遠鏡DEV-5，融合3D攝錄、變焦、自動對焦及防震功能於一身，認真架勢！無論去觀鳥、睇賽馬甚至入球場睇波都好啱用，睇得清楚之餘仲可以影相兼拍片。

售價：$15,980（11月推出）

望遠鏡設計

9月底日本公布DEV-5時，淨係睇產品照片跟功能描述，起初覺得設計有點奇怪，好懷疑怎樣可將3D數碼攝錄功能放入望遠鏡內。但日前香港發布會上，小記拎起新機把玩時，便發覺一個又一個疑團變得合理化，而且真係應付到實際需要。外形方面，機身比之前同廠3D DV的體積為大，但拎上手卻冇想像般重，外層附有彈性物料，長時間「捕」住景物仍能保持良好手感，就算模特兒成日拎住擺甫士都唔攰。

從機背睇，DEV-5同一般雙筒望遠鏡冇乜分別。

按快捷鍵能切換影相模式，可拍攝710萬像素相片。

Sony推出多款Cold Shoe插座配件，如圖中的5吋屏幕。

20倍放大追焦

比起一般光學望遠鏡，DEV-5的優勢係擁有高倍數放大率及自動對焦功能。在拍攝相片時可達20倍放大率，換轉成35mm相機鏡頭焦距等同1,320mm；在拍3D影片時，亦能做到5.4倍放大率，即等同焦距344mm，比一般3D攝錄機優勝。而平日使用望遠鏡時，當觀察物體高速移動，要郁鏡頭再擰旋鈕慢慢對焦相當不便，為此新機提升自動對焦功能，讓用家Zoom in或Zoom Out時更順滑，還配備光學防震系統，長焦距拍攝都能捕捉到穩定影像。

DEV-5收音系統做得幾好，支援立體聲音效。

選用兩支高質素Sony G Lens，攝錄3D影片。

轉換2D或3D時需進入Image Quality/Size調校。

拍全高清3D片

至於新機的攝錄系統就與同廠3D DV沒太大分別，用上兩個1/4吋Exmor R CMOS感光元件搭兩組BIONZ影像處理器，配合一對Sony G Lens鏡頭，實拍效果清晰，支援1,920×1,080/50p影片；至於靜態影像方面則最高可擷取710萬像素（3,072×2,304），功能不俗。但稍嫌麻煩係想轉換2D或3D攝錄時，要入Menu慢慢揀，唔可以在機身直接推掣選擇。幸好機身其他操作都幾貼心，如錄影按鈕左右兩邊都有，左右手用家均可迅速按掣；而新機還加入GPS功能，配合Geotagging軟件可顯示影片或相片的坐標；另外機頂設有Cold Shoe插座，可接駁收音咪或5吋屏幕，擴充性不俗。