麥玲玲X吳創木泰老友
美食就像一股萬有引力，將愛吃的人牽引在一起。堪輿學家麥玲玲和九龍城名店金寶泰國菜館老闆吳創木就因為嗜辣、愛泰國菜而結緣，最初只是餐廳老闆遇上名人客仔，後來志同道合變成「食友」。大家經常在餐廳內飲紅酒、吃泰菜兼享私房燒鮑魚、燒羊架、炆海參等，食趣早已超越餐牌。今日老友記一聚頭，又再講飲講食，實在「泰」老友啦！
麥：麥玲玲 吳：吳創木
地道泰菜講氣氛
麥： 我鍾意食泰國菜，仲好鍾意泰國！一年起碼去幾次，通常去布吉和曼谷，Hea吓抖吓氣，住Resort和歎Spa係指定動作。吳老闆，聽講你啱啱去意大利同法國旅行喎！
吳： 係呀！去咗十幾日，先返柬埔寨，再去歐洲。你講起去泰國，我又想去！我都好鍾意泰國，特別係曼谷，可以食好嘢，又可以四圍逛吓。最鍾意在泰國食木瓜沙律，我會撈埋椰糖、魚露、檸檬和花生吃，味道鹹鹹甜甜帶點辣，好食。
麥： 辣嘢我最啱！所以咖喱、冬蔭功統統都是我至愛。不過泰國的酒店餐廳，水準一般，泰菜驚喜不大，如果食海鮮，香港的店做得好啲。但泰國的食店勝在環境好，樹影婆娑，好有大自然Feel！試過在船上開餐，又試過在海邊吃飯，有靚景伴吃，感覺一流。愛吃泰國菜的另一原因是氣氛好Casual，大夥兒齊齊吃，最熱鬧最開心。
泰國人做出風味
吳： 哈！我覺得泰國與香港的水準差不多；不過泰國的地道菜比較辣。
麥： 時代唔同，依家泰國菜在香港大流行；在香港，只要材料新鮮，一樣有好的泰國菜吃。
吳： 其實以前與現在的泰國菜不同，以前泰國菜館的老闆大多是泰國人，可以做出地道風味，控制到水準；現在老闆大多是本地人，如果泰國廚師唔聽話，水準唔穩定，味道差好遠o架。
麥： 你食過最好的泰菜在哪裏？
吳： 哈！在香港！大概是1985、86年左右，我當時還在工廠工作，有一天去九龍城寨，遇上一間家庭式泰國菜館，應該算係香港最早期的泰國餐廳。雖然冇招牌，環境又簡陋，但食物味道好，滷水鴨粉、泰國咖喱，似足我在柬埔寨嘗過的味道，現在香港好難搵到。
麥： 我都有周圍試食泰國菜，幾乎走勻各區；自從記者朋友帶過我來金寶，之後每逢去九龍城都搵你啦！當正你係Friend o架！哈哈。
吳： 以前未開餐廳，都會周圍試食泰國菜，不過開咗舖就冇喇。
麥： 點解呢？開咗舖更應該周圍試吓啊！
吳： 多咗人識我，怕尷尬嘛！唔想餐廳老闆覺得我去「踩場」。
一身好廚藝
麥： 哈哈，原來係咁。我次次來到金寶，你都會私人醒啲好嘢畀我食。
吳（扮嬲）： 你試過有次來食飯，臨開飯前一個鐘，竟然拎啲已浸發嘅海參畀我，叫我即刻煮！好過分啊，哼！
麥（拍膊頭）： 你手勢好嘛！記得上次你用上湯、白胡椒粒燴海參，又香又鮮甜，真係好好味！無浪費到我的靚遼參，好貴o架！哈哈。
吳： 我仲記得有燒鱔、燒鮑魚添！店中每逢有新出品都請你試食，讓你畀意見。
麥： 所以呢，我多數都係兩手空空到來，翹埋雙手等開餐！你的燒BB羊架和煎魚令我食過翻尋味。
吳： 做朋友冇計啦，你每次都帶靚紅酒請我飲，哈哈。
麥： 不過，唔可以帶大閘蟹來，唔想變成咖喱蟹！其實我都好鍾意食你嘅咖喱蟹，而且講明要加辣！另外你炒小菜、煲翅都好得。
吳： 這些都是我的拿手菜，我經常都親自煮冬蔭功、炒咖喱蟹同辣椒膏大頭蝦o架。我以前在工廠工作，要在半個鐘內煮3餸1湯，廚藝就係咁鍛煉出來的。
電話教煮餸
麥： 雖然我都經常入廚，但遇到難題，都要打電話問你功課（大笑）。上次我去廚藝中心示範菜式，諗住煮粉絲蟹煲，就打來向你偷師，記得嗎？
吳： 記得！我教你用上湯和魚露烹煮，粉絲盡吸湯汁精華，自然好食。
麥： 你仲教我用肉蟹煮，但我去到街市畀人笑！檔販問我其實係咪要買花蟹。
吳： 做中菜通常會用花蟹，味道較鮮甜；但我覺得肉蟹好食啲喎，啖啖肉。
麥： 結果我兩種蟹都買齊。記得有一次，我在家煮檬粉，煮來煮去檬粉弄作一團！仲畀老公笑添，結果又打畀你求救。
吳： 你冇落油嘛，檬粉就會一「餅餅」囉。你老公應該多謝我啦！
麥： 我點知喎……依家就唔同，佢大讚特讚，真係多謝晒你！
吳： 你幫我隻馬「辣得喜」和「辣得醒」改名畀意見，都冇托手，睇流年、風水都靠晒你。
麥：老友記嘛！哈哈。
麥玲玲Profile
超人氣堪輿學家，笑容可掬，愛飲愛食，在電視台任節目主持、寫飲食專欄、到內地主持樓盤講座，剛剛又推出新的生肖運程書，百足咁多爪。
吳創木Profile
柬埔寨華僑，來港40多年，當製衣廠工人，及後投身飲食界，先後開設金寶泰國菜館和金寶越南餐館，在九龍城叱咤一時，近年更「撈過界」，開食品雜貨店和甜品店。
撰文：楊淑英
攝影：譚建章
查詢電話：2716 7318