大棠War Game車場扮羅拉開戰

Mission 1

街道區　車場攻防戰

大棠野戰場地服務中心的戰區甚多，兩位羅拉都唔知從邊度打起，咁啱有班發燒友打完街道區，一臉滿足出來，所以決定Mission 1要攻入街道區。這裏的車場擺放多架汽車同路障，有足夠空間畀大家搵Cover狙擊對手，扮演潛入者的一方，任務係攻佔遠處的警車，另一方當然佔據有利位置死守到底。場地顧問及總教練馮上韋（Jacky）表示，警車係佢買完駛入嚟。「試過有位War Game迷玩到起，對住架警車拳打腳踢，但我希望大家錫住場內嘅車，打爛咗大家都冇得玩。」收到！

採訪當日見一班發燒友在街道區車場打攻防戰。

街道區汽車的蓉蓉爛爛感覺，係多年槍戰下的戰績。

Mission 2

大戰壕區 一氣呵成

現場連警車都有，加強街戰的臨場感。	每個戰場都花足心思設計，如車場便有多架車作Cover。	場地顧問及總教練Jacky指，大家打War Game要注重紀律和安全。

另一個必玩場地係於入口附近的大戰壕區，兩位羅拉勁醒目，一入戰區已發覺場地設計同其他War Game場有啲唔同，於大直路中挖咗唔少藏身位，衝上敵陣時都有位走盞，就算做攻方都唔會好蝕底。而且場地有齊晒配套，經過戰壕後會進入Jungle區，然後便可入村，感覺似足真實戰場，部署戰略時可以一氣呵成。

軍服可提供一定保護，入到草叢或瞓低伏擊敵人都唔怕磨損手腳。	場內有多款電動氣槍租用，怕痛的玩家則可選擇彩彈氣槍。	大戰壕區設計花盡心思，有不少凹位隱藏，仲可以直通Jungle入村。

Mission 3

堡壘戰場 高牆花心思

除街道區同大戰壕區外，堡壘陣、模擬屋、輪胎陣等15個戰區都好吸引，想一時三刻玩晒真係冇乜可能，但由於Jacky參加過正式軍事訓練，每個戰區都做得相當專業，亦了解到War Game迷的真正需要，分幾次來玩都值得。

War Game場另一特色是24小時開放，而且地方大、攞正牌，假日人多時都可在唔同戰區輪流玩，夜晚更可以在休憩區BBQ，本來Jacky想約兩位羅拉燒嘢食，但由於佢哋又有新任務，惟有留低一句「後會有期」。

保護裝備睇真啲

背心短褲的羅拉Feel打War Game純屬視覺效果，正式落場時，當然要着齊成套標準裝備先得，幸好迷彩軍服、保護眼鏡、氣槍等場內全部有得租，約齊班Friend隨時玩得。

最緊要安全

War Game幾刺激都好，Jacky提醒玩家要留意場地、遊戲及槍械的安全性：「玩得War Game就要聽從指揮，在Game內被打『死』唔可以周圍行，而且進入休憩區時記得要褪出彈夾，因為流彈無眼，有乜損傷盞掃興！」

收費：

租借裝備（電動氣槍）：

$300\人（氣槍一支、1,800發BB彈、軍裝一套、防彈面罩）

自備裝備：

$190\人（自備氣槍不可超過1.8焦耳）

租借裝備（彩彈氣槍）：

$380\人（彩彈槍一支、200發彩彈、軍裝一套、防彈衣、防彈面罩）

大棠野戰場地服務中心

地　　址：新界元朗大棠荔枝山莊

交　　通：於朗屏鐵路站乘巴士K66於大欖郊野公園下車步行約15分鐘，或於元朗鐵路站乘搭的士，費用約$40。

查詢電話：5109 4848

其他War Game好去處

W28活動中心

場地設計頗具心思，如設有雙層貨櫃場、油桶城堡、木屋區和迷宮等，其中最煞食係有架軍用直升機提升臨場感。場地選址亦較近民居，一抬頭雖然見到幾十層樓高的屋景，但勝在交通方便。

地　　址：天水圍天慈路馮家圍

查詢電話：2617 9339

X-Game Square

　　秋高氣爽好應該走到戶外，但要約齊腳去郊區打War Game都唔易，所以近年不少新場已進駐工廠大廈，如觀塘、新蒲崗等便是War Game「重鎮」。這些工廈大多模擬街頭小巷，做得似模似樣。

地　　址： 觀塘偉業街146號美嘉工業大廈2樓B~D室

查詢電話：2191 2878

荔枝山莊體驗大自然

　　山長水遠入到元朗打War Game，不妨順道前往毗鄰的大棠荔枝山莊親親大自然。園內節目甚豐富，可以親身體驗有機農莊，餵飼過萬條錦鯉和小動物等。啱季節的話，仲可以摘士多啤梨、大樹菠蘿等，幾啱一家大細玩。不過秋天特別多學校旅行Booking，記得預先打電話問吓有冇位。

地　　址：元朗十八鄉大棠山道11號

查詢電話：2470 2201

撰文：布偉倫　攝影：梁偉德

模特兒：Christina、Maymay

（M.Spy Model）