搖滾復興 爆Hit Band友
在香港夾Band，經常被人睇低，同義詞是憤怒青年、不事生產，但近年RubberBand、Mr.等樂隊冒起，新碟銷量過萬，又開Concert又拍廣告，在香港玩Band，忽然又見出路。今次訪問的Supper Moment及Ever樂隊，捱過戶口不足$100的苦日子，但因為懂得包裝，終於在樂壇「響朵」，賣碟成績不錯之餘，還代表香港與Luna Sea、盧廣仲等歌手同台演出。看來昔日Beyond、太極的搖滾盛世有機會重現！
代表香港 40,000人前Jam歌
新進樂隊Supper Moment，前後出了2張EP及1張大碟，當中《再次心跳》今年8月出碟時，更雄踞CD Warehouse賣碟榜冠軍兩周，後來要加印才能滿足各大唱片舖需求。早前台灣國際海洋音樂祭更點名要求他們作為香港代表，與盧廣仲在40,000觀眾面前齊齊Jam歌，夠晒威水。今天略見成績，主音Sunny不忘多年辛酸︰「最難捱係讀書嗰陣，家人反對，自己又冇錢。為咗賺錢試過喺街頭賣唱，好彩已成過去。」結他手阿雞則最記得頭一場表演︰「那時初夾Band唱《最後晚餐》，台下得兩個觀眾，仲要全程食緊飯，真係有啲『灰』，所以現在有咁多人支持，我哋會好好珍惜。」
社會轉變 多得網絡力量
樂隊受歡迎，亦多得時代變遷，鼓手阿達說︰「以前夾Band，旁人第一時間想到『抗爭』。但其實『抗爭』只係Band Sound一種，現在聽眾包容度更高，好似我哋玩嘅城市民謠，就是表達正面同健康訊息。」Sunny補充，以前夾Band常常被學校抗拒，但現在去School Tour就好受師生歡迎，當然包裝亦好重要。「以前香港樂隊的死因係唔識包裝，所以出碟時經理人特別找來著名髮型師和攝影師幫手，更試過將唱片包裝成潮書出售，結果3,000隻新碟迅速售罄。」有粉絲更將新曲擺上網流傳，所以話現時夾Band比以前幸福得多。
走上地面 夥拍Luna Sea
葉世榮旗下樂隊Ever早於2000年成立，兩年後於Yamaha Asian Beat香港區決賽中獲得總冠軍，之後更代表香港到馬來西亞參加亞洲區決賽，並獲得個人表現大獎。多年來足迹遍及新加坡、台灣等50多個地方，但最巴閉是今年8月獲日本殿堂級樂隊Luna Sea結他手Inoran邀請為演唱會嘉賓，在日本人前唱盡他們的Happy Rock。成功背後是否經歷過很多辛酸？主音家豪謂最辛苦是08年以前︰「那段時間Band Sound不受重視，試過出Show時主辦機構連器材也沒有準備，唱歌時又因太嘈畀人投訴。」
一手包辦 捧樂隊更划算
Beyond等樂隊80年代發光發熱，吸引很多年輕人踏上打Band之路，只是後期唱片公司覺得負擔整隊Band的支出很犯本，故此一直冇人睇好；然而家豪卻認為近年情況開始改變︰「捧一位歌手要搵人作曲作詞，仲要搵監製編曲同樂隊伴奏；相反樂隊一手包辦了曲詞唱作，出Show又自己搞掂晒，唱片公司計落仲划算，投資自然比以前更揼本。」同時互聯網興起令聽眾厭倦了流行K歌，從前想派歌一定要經電台或電視台，但現在上facebook和YouTube就可以。問到如何令香港Band Sound更蓬勃？家豪笑言政府不要活化工廈就可以。「很多Band仔都要租工廠大廈來練歌，你搞活化即係趕絕佢？」
夏韶聲：「撐音樂唔好搵人笨！」
提到Band Sound，不能不問本地搖滾教父夏韶聲（Danny Summer），他近年努力提攜後輩，更同電視台搞Music Battle音樂會發掘有潛質的Band友。他指香港有很多獨立樂隊，估計單是觀塘區便有超過800隊。「好多都好勁揪，但正正因為軟件成熟咗，表演場地和贊助等硬件冇相應增加，搞到佢哋練完歌都冇地方表演。」
提到很多樂隊為了表演不收分文，他更大動肝火︰「香港好多人都話撐搖滾，但只係空喊口號，埋單計數就畀好少錢人，甚至搵人笨唔畀錢，樂隊又怎樣生存？」Danny指現時搖滾是否復興還言之尚早。「你看ToNick上年改編了Wham!首《Last Christmas》，結果網上點擊率有73萬咁多，所以玩音樂唔好鑽牛角尖，受歡迎再玩自己喜歡的曲風都未遲，總之記住『曲高未必和寡，媚俗一定低裝』。」
林祥焜教扮Rock友
夾Band要搞包裝，於高潮樂隊玩Look玩到出晒名的林祥焜，最近就轉玩50年代貓王帶起的Rockabilly音樂，其樂隊「BIG-ROD大支嘢」更飛機頭、黑皮褸上身。他說每種音樂都有其指定服飾，若玩Rockabilly，以下補品不能少︰
Lewis Leathers電單車皮褸
1982年成立的英國皮具品牌，不但用料優質，還可自訂款式。
售價︰$8,000~$10,000
網址︰http://www.lewisleathers.com
George Cox厚底皮鞋
同是英國百年品牌，貓王、Sex Pistols等音樂人都是愛好者。
網址︰http://www.georgecox.co.uk
Grant's Golden Brand Pomade水溶髮蠟
Rock友最愛All Back頭，這髮蠟特別為乾髮濕梳重整而設。
售價︰$150
查詢電話︰3484 8577
夾Band創作補品
聽完Supper Moment和Ever的心路歷程，以及前輩分享後，各位心中是否有團火想夾Band呢？基本結他樂器毋須多講，以下介紹一些創作補品畀大家，由練習的強化裝備，聚腳的Band房，到經典發燒碟都有，多聽多練自然事半功倍。
發燒碟類：《There's Rock & Roll In CHYNA》搖滾經典
CHYNA由結他手蘇德華、Bass手單立文及亞洲鼓王Don Ashley組成，1983年推出首張大碟，被譽為香港搖滾史上極重要的專輯之一，《Within You'll Remain》更衍生出不同版本。
Band房類：觀塘工廈 自建私竇
觀塘一帶設有大量工廠大廈，一般300餘呎單位按金、上期連租金只需二千幾，適合改作Band房之用。但切記不要設於頂層，因為天台熱力會影響器材運作。
器材類：Pearl Rhythm Traveller 練習鼓
Size比正常細一半，更附送纖維布以包裹鼓面，家中練習時可減低噪音。
售價：$3,200
Jimi Hendrix貓王別注Pick
Pick上印有Jimi Hendrix及貓王頭像，撥弦時更投入。售價：$50/12~18塊
查詢電話︰2723 9932
本地樂隊盛事
Yamaha Asian Beat
亞洲最大型的業餘樂隊比賽之一，前身為Yamaha Band Alert，及後易名為Asian Beat。
Music Battle
為本地樂隊提供表演平台，每月均以不同音樂類型為主題，還有星級音樂人上台Jam歌。
撰文︰陳志滔
部分攝影︰郭凱敏、陳世昌