12吋俠影爆嘴再現

蝙蝠俠在廿幾年前只係一個穿灰色衞生衣，冇乜肌肉感可言的蒙臉阿叔。好彩1989年，鬼才導演Tim Burton出手，擺脫美式漫畫風格，拍「活」了這位英雄。Hot Toys今次便出力將Michael Keaton版蝙蝠俠化成1:6 Figure，角色肌肉紋理和武器配件可用鬼斧神工來形容，相信粉絲又要荷包出血。

圖中為試辦款式，與正式推出的版本或有少許分別。

可換面相爆嘴逼真

今次蝙蝠俠的頭雕由Kojun及GOX操刀，這對擅長雕陽剛味角色的拍檔，無論在Figure的頭笠紋理、雙眼和雙耳的擺位比例都拿捏得恰到好處，還附有冷靜、憤怒和爆嘴3款面相供替換，近看之下相當自然，尤其是爆嘴那款的血帶瘀黑，真實感爆燈。除了面部表情可換外，眼部亦引入PERS系統，雖然全程笠實頭罩，但配合可轉動的眼珠，能演活Michael Keaton的凌厲眼神。惟美中不足是頭部為求與Body更統一，導致可動性減少，想擰側啲個頭擺甫士都唔易。

貼身黑甲武器齊全

講開Body，新作換上貼身的黑色盔甲，金屬感和皮革光澤兼而有之，全賴Pan雕製出包膠肌肉紋理加上JC. Hong塗裝，令貼身盔甲的爆肌感倍增。幸好可動性唔似頭部咁「硬頸」，手（月爭）、膝蓋內部亦預留了關節位，令動作唔會太生硬，而且斗篷內還加了鐵線，舉手攤開斗篷或包實全身等電影動作都可重現眼前。雖然1989年版蝙蝠俠的裝備冇新一輯咁勁，但電影出現過的武器如蝙蝠形倒鈎、繩索發射器、煙霧彈、忍者鏢等都有齊，令人回味。

繩索發射器採用雙向設計，忠於原著。	斗篷內部有鐵線，可拉到前方包住Body。	發光地台特色欠奉，幸好有7隻手掌換。
另提供憤怒和爆嘴面相，加上PERS眼球，表情逼真。	原著武器都幾齊，細細件手工精細。

1:6 Batman（Michael Keaton Ver.）

售價：$1,480

預訂價：$1,430

發售日期：2012年第1季

同場加映小丑面相奸得像真

Tim Burton救活的角色又何止一個，同一電影中為人津津樂道的還有Jack Nicholson版小丑，今次亦得以化身為1:6 Figure。先講頭雕，新作忠於原著塗裝，露齒奸笑的小丑嘴捕捉得極神似，雙下巴的肌肉摺紋雕得活靈活現，配合本身略見肥胖的Body，原來是加入棉花為它「增肥」，足見細心。至於配件方面，附有啤牌、美鈔、防毒面具、長身左輪等，玩味很濃。