Matching × Speed Dating男女五式唔怕獨
香港依家女多男少，男的日日OT應酬，女的躲在房間上網，事實令到有不少人為尋覓另一半而煩惱不堪。面對「三字頭」的不斷催逼，想快啲搵到真命天子，唔想日日空等，就要謹記今次專家們醒各位的「男女五式」，如果練到靈活貫通，包你一定唔怕「獨」！
驅「獨」必學
近年興起港女、宅男等名詞，提起「港女十式」定必會諗起那套擺甫士秘技。平日與同事Social可能你就叻，但講到上陣交鋒可能會變得手足無措，今次就請婚姻配對工作室負責人BoBo與心理輔導專家Silver，傳授「男女五式」見面實戰攻略。
女仕
第一式：傾談留伏線
如果女方遇着一個「唔係好主動」的男生，無端端打畀對方，會顯得唔夠矜持。唔想咁樣，就記住傾談時留有「伏線」。例如對方從事金融業的，傾談時就可以講吓自己都有少少投資問題想搵人指點，咁之後主動打畀男方都容易搵藉口。
第二式：他朝也相逢
如果覺得對方唔係「你杯茶」都唔好一眼定生死，可以畀多一、兩次見面機會大家。而且拒絕時不要太狠，最好客客氣氣地婉拒，須知道香港地是一個很細的地方。
第三式：既聽且說
與異性初見面，女性好多時會表現得含蓄一點，但如果你全程一味齋聽，佢唔講到累，你都聽到悶啦。因此聆聽和回應要攞個平衡，有時更可主動開新話題，有來有往，大家自然傾得更舒服。
第四式：話急易出事
諮詢顧問的分折指出，女性緊張時會變得「異常多口」，會不自覺地加速說話。這時候要提醒自己做番聆聽者多啲，或者飲吓水、去吓洗手間，總之唔好口沫橫飛嚇親對方。
第五式：忌單刀直入
直接問人幾錢人工，有冇車和樓，唔使講都知會顯得貪錢，其實只要細心留意對方的行業、喜好、興趣已可看出一些端倪。另外一些敏感的政治話題和宗教理念也要小心討論！
男仕
第一式：她不是你的老闆
曾經遇過一個從事IT工作的男士，第一次見面就不停講自己的工作事情，仲要講到非常投入！投入係好事，但記住對方唔係你老闆，你唔需要向她提交「工作報告」，尤其是IT之類的工作，女士們可能聽到一頭霧水。
第二式：對白多創意
第一次見面，全場「對白」千篇一律，第一印象肯定大打折扣。女仔普遍喜歡一些有點見識和幽默感的男士，所以平日記得多點睇社會趣聞，甚至記定一兩個笑話，咁樣自然唔會悶親對方。
第三式：緊張勿沉默
據Matching諮詢顧問分析，男性通常在緊張時除了咬手指、撥頭髮外，會表現得異常沉默。傾談時記住唔好當自己去面試，不用一味強迫自己講嘢，有時問吓對方問題，多啲互動，自然唔會有咁大壓力！
第四式：拿捏聯絡時機
女方通常覺得應該由男性主動聯絡，所以千祈唔好怕畀人覺得自己「猴擒」而等女方打畀你。最好隔日就發個短訊，然後開始打電話找對方傾偈，之後相約下次見面就穩陣得多。
第五式：不是明天就結婚
小心自己太「揀擇」，眼前人不是明天就要跟你結婚，所以第一次見面時，即使對方的條件有「些微」不合要求，也不要將那點無限放大。可能對方慢慢會改變，也可能你的真正需求會慢慢調節過來。
摩登Matching男女配
一提起「相睇」，很多人都會耍手兼擰頭，或許因為被電視的老套相睇橋段嚇親。而近年就出現一種名為「Matching」的婚姻配對服務。究竟甚麼是Matching呢？婚姻配對工作室負責人表示：「我們提供的Matching服務，某程度是擔當男和女之間的朋友角色，幫助他們互相了解，不會只注重『數據資料』的相配。」對比起傳統婚介服務，諮詢顧問會先為客人進行性格傾向測試，並會花時間傾談接觸，讓客人放心分享對異性的要求、過往感情生活等。
穿針引線一拍即合
在Matching中，諮詢顧問會以朋友角色出現協助帶起話題，待話匣子打開後才慢慢「退場」。從事銷售行業的謝小姐，於個多月前開始參與Matching服務，並成功認識到現時的男朋友。謝小姐坦言：「面對30歲的關口自己都感到壓力，而公司多數係女同事，試過上網識男仔，但覺得唔多適合。之後嘗試參加Matching服務，估唔到男方第一次約會便訂了我最喜愛的意大利餐廳，結果一拍即合。」
另類Speed Dating
除了Matching外，外國近年流行的Speed Dating也是不錯選擇，優點係「夠快夠多」。Hong Kong Speed Date有7年舉辦Speed Dating活動的經驗，一般每星期會舉辦兩次聚會，多數約齊15男15女就「開班」。負責人Rachael指出每次活動大約有兩個鐘時間，一開始每人會派發一張有齊人名的記錄紙，跟住15位男士會輪流與15位女士傾談4分鐘，如果你想與對方進一步聯絡，便可於約會紀錄紙上圈YES。活動結束後如果發現雙方都圈了YES，他們就可以互相交換聯絡方法。
一次識十幾位異性
Rachael舉辦的活動主要針對專業人士，CEO、醫生、律師都有，參加者的年齡更有年輕化現象。她亦有擔任聚會的MC，而她自己之前都參加過其他Speed Dating活動，坦言起初都怕短短的傾談不知如何開口，對住一班陌生異性會十分尷尬。但活動過程中有MC主持帶動氣氛，不時會出聲講笑，令大家輕鬆投入，傾傾吓就唔覺得尷尬，仲可以一次過識到十幾位單身男士。
愛情小說家 感覺先行
梁佩瑚寫了近十年愛情小說，亦是一位專欄作家。現為獨身的她，覺得搵對象最重要先看自己的感覺，不要被太多外在條件影響。如果對方只有外在條件吸引到你，但兩人相處沒有戀愛感覺，也不會是一件幸福的事。
梁佩瑚坦言，男少女多的數據令現今不少男士囂張咗。
時裝達人教路 衣着不用太Formal
所謂人靠衣裝，不少人都會為初次見面着甚麼衫而煩惱。時裝達人Wallace Kwan認為打扮應配合自己的性格喜好，不宜過分造作。「唔好只着眼穿甚麼衣服，也要留意全身配合，好似頭髮、眼鏡、指甲、袋等都要執一執，重點係望落乾淨。」Wallace認為，Dating唔係去見工，不用太過Formal，也不應為了迎合對方而刻意轉變形象，他自己較喜歡A.P.C.這個牌子的衣服，簡潔舒適。
Wallace是I.T創作總監，對時裝配搭很有要求，覺得由頭到腳都係時裝一部分。
女士上身可穿CHOCOOLATE橫間T恤，襯鬆身短裙，加埋一對短靴，舒服得來略見性感。
A.P.C.屬法國牌子，男仔如果想斯文一點，上身可以穿格仔恤衫，再配合淨色的布褲。
見面地點 留意氣氛
男女雙方第一次見面，應該選擇一些空間較大，方便交談的地點，有得飲吓嘢又可以吃得飽就最好，好似COVA和agnès b. cafe就係不錯的地方。
COVA主打意大利菜，全港有7間分店。除了可以坐低飲嘢外，還有提供小吃、意大利粉、海鮮菜餚等。建議可到利園分店，座位空間較大，傾偈都傾得開心啲。
查詢電話：2907 3399
agnès b. cafe在香港有8間分店，建議前往銅鑼灣京士頓街分店。這裏屬agnès b. LE PAIN GRILLÉ，主打法國菜，富有19世紀情調，飲完咖啡仲可以歎大餐。
查詢電話：2577 0370
撰文：李潤康
攝影：郭凱敏、陳世昌（部分相片由被訪者提供）
模特兒：Cherry、Leon、Ray、Choyi（M.Spy Model）