P-07C冧女花心思

很多人話女人錢易賺，化妝品、護膚品、手袋服飾長賣長有，偏偏科技產品部部黑沉沉，女士自然唔Like。向來花臣多多的日本手機品牌DoCoMo今期又有新搞作，於P-07C白色大芒機身加上粉紅邊框，內裏仲有心心虛擬鍵盤、雙人自拍軟件、可愛貼紙相等工具，女士們見到實心動！

將鍵盤變為心心，女仔實冧！售價：$4,380

桃紅邊線點綴

日系機的外形向來煞食，P-07C亦不例外，純白流線型機身的邊框，加入粉紅及桃紅邊線，設計醒目又可愛。最重要是屏幕有4.3吋咁大，而且解像度達480×854，無論睇片、上網或影相都更加方便；屏幕下方還備有Android機常見的實體功能鍵，操作方便。可惜是機身相對較闊，就算是小記亦難以單手拎住打字，手仔細細嘅女士記住要捉實手機啦！

鍵盤玩花臣

不少女士都鍾意玩吓手作仔，新機亦因此加入D.I.Y.元素，內置《kebegami Deco》換背景圖案、《PriPri Marron Lite》加入貼紙相效果等，當中以《Fitkey》最好玩，預載多款虛擬鍵盤樣式，可選擇圓形、心形按鈕之餘，更可更換底色、背景和圖案，咁就可以夾番手機主題，而且連鍵盤大小、位置都可調校，效果與別不同，保證唔會同人撞款。惟這工具只支援九宮格式的日文和英文鍵盤，大家用開嘅QWERTY鍵盤就暫時未能支援。

機背貫徹白色風格，更備有510萬像素鏡頭。

鏡頭支援自動對焦，加上LED閃燈，就點影都得啦！

機前備有3個實體功能鍵，觀感不失簡約。

自家獨特介面

新機屬Panasonic出品，雖然不像先前推出的P-03C加入LUMIX相機功能，但賣點依然十足，除了屬品牌首部Android手機，預載Android 2.3系統外，更配備1GHz處理器和512MB RAM。廠商更特意加入自家介面Touch Speed Selector，鎖機頁採用側滑式手勢解鎖，而且左右兩邊都可以滑動解鎖，照顧埋左撇子用家需要，好貼心！如果唔啱用仲可切換至公版Android或者DoCoMo UI，自由度極高。值得一提是，新機已預載多國語言，更支援繁簡中文，睇香港網頁和短訊都冇亂碼！