陳嘉桓讚EVO 3D雙鏡激凸

3D電影和3D電視大行其道，但可以真正拍到3D效果的產品並唔多，就算有雙鏡3D相機都牛龜咁大部，便攜性始終差一截，好彩依家連智能手機都可以拍3D，說的是HTC剛推出的EVO 3D。機背雙鏡頭可玩盡3D相片和影片，仲可即時經4.3吋芒裸眼重溫，引得陳嘉桓拎住部機係咁影，大讚：「3D相好『凸』出，過癮！」　

售價：$5,398

3D拍攝即時睇

不少人鍾意用手機影Snapshot，但手機來來去去鬥像素、玩特效，新意欠奉。EVO 3D特別在內置兩組鏡頭，只要一推機側的2D/3D切換鍵，就可啟動雙鏡頭拍攝3D相片，唔使學都可輕易上手。用家更可透過4.3吋qHD裸眼屏幕，即時感受畫面前、中、後的立體感，唔會睇到頭暈眼花！惟要留意，雖然鏡頭達500萬像素，但拍攝3D相片時只能去到200萬像素，幸好仍可拍720p 3D影片，玩味依然十足。

立體電影遊戲

若然對影相興趣不大的話，新機亦提供一系列3D內容，頭炮是以HTC Watch服務串流睇片，不但有齊各新片Trailers，出機更預載一套完整版《青蜂俠3D》電影，唔使戴眼鏡都可欣賞周董的荷里活首作！此外，機身還內置多款3D遊戲如《Spider-Man: Total Mayhem HD》、《Need for Speed SHIFT》等，搭車用來消磨時間一流。雖然機身未有HDMI端子，但卻支援更新的MHL介面，可透過microUSB插頭連接HDMI輸出，用大電視睇片更爽！

背殼採用橡膠物料，最大亮點是加入雙鏡頭！

屏幕解像度達qHD，睇16:9影片時可飛走黑邊。

機側特設快門鍵，支援半按對焦，更備2D/3D切換鍵。

雙核效能升級

新機大玩3D效果，對硬件的要求自然更高，故此EVO 3D換上1.2GHz雙核心處理器和1GB記憶體，拍攝及重播3D時未見Lag機，抵讚！軟件方面，一如先前的Sensation預載Android 2.3系統，可惜未有換上3D介面，想玩立體介面就只能靠Sense 3.0的天氣動畫及轉頁過場。不過為加強續航力，廠商特別換上1,730mAh鋰電池，長氣啲、玩耐啲，算是另類補償。