Android上身OleTV煲劇追facebook

攤喺梳化睇電視，突然想起早前在facebook留言，想睇吓有冇人Like但又唔願郁，可以點？其實除了可用智能手機、平板或手提電腦外，依家又多一種新方法，就係直接用電視玩Apps追facebook！ölevia剛推出的OleTV數碼電視，便整合Android 2.2平台，另可配體感遙控鍵盤，隨時上網留言都冇問題，仲可以一邊睇電視、一邊玩Android，感覺特別High。

售價：$2,099（22吋）、$2,490（24吋）、待定（26吋、32吋及42吋）

Android特別介面

玩開Android的你或許會問，手機就話可以篤芒上網，但喺電視點樣操控呢？原來OleTV內置的Android 2.2平台，特別設計了一個新介面，只要按遙控器上的「Android」按鈕，電視左方便會出現一列Internet Home，直接上到facebook、eBay等，一個電視遙控器已做到晒睇網頁、玩Apps等操作。用家還可另購體感遙控器，學Wii咁玩小遊戲，反應和準確度都算不俗，加上有埋QWERTY鍵盤，上網打字更加方便。

開Apps玩facebook

小記試開facebook時，屏幕左列顯示facebook的Status，右邊則會繼續播電視畫面，感覺像是畫中畫一樣，頗新鮮。此外，新機還可安裝Android Apps及遊戲，可惜的是電視不支援G-senor功能，也不能篤芒操控，所以有些遊戲下載到都玩唔到；而且好多Apps都不支援1,920×1,080全屏幕，開出來只係細細一格，玩樂體驗只屬一般。

按下遙控器的Android鍵，就能啟動Android系統。

體感遙控器有埋QWERTY鍵盤，售價為$399。

高清屏幕煲劇

很多人鍾意煲劇，但又唔想睇住個細電腦芒，而OleTV備有22吋至42吋型號供選擇，用來睇片至啱，而省電設計令使用壽命長達10,000小時。此外，它支援多媒體播放功能，經USB插入外置硬碟便可播放RMVB、MPEG4等主流影片格式，全屏幕播放都能流暢顯示；最吸引是支援Flash Player，可上視頻網站睇串流影片，平日睇電視唔啱心水時，都可立刻轉去上網睇片，甚至連到外置硬碟煲劇都掂。