Jessica C.夢的啟航

每逢提起Jessica C.，「警鐘胸」三字定必浮現眼前。她憑可愛形象及逼爆身材，拍攝兩個廣告後，在港一炮而紅，工作源源不絕。JC笑言自己受到幸運之神眷顧，來港之前並不抱有任何期望，工作單單為了餬口，更從來沒想過會有飛黃騰達的一日！

初來港時，更發生了一段小插曲！「我一嚟到香港就大病咗兩日，錯過咗Canon同Wacoal嘅試鏡。不過真係好好彩，佢哋畀多次機會我，不過就連個評審都怕咗我，戴住口罩見我。哈哈！」廣告播出後，她的知名度大增，成為各大品牌的寵兒，工作一個接一個。出席活動時，她又毫不吝嗇好身段，「警鐘胸」自然成為她的標記，奠定名模地位。

雖然在港名利雙收，但她並未因此而自滿，反而時刻鞭策自己，不斷作新嘗試。「我由十五歲就開始做模特兒，覺得模特兒係我嘅一部分。模特兒成日都要扮到靚靚見人，相反，做演員就有好多發揮嘅空間，好有挑戰性！」因此，除了老本行模特兒工作外，近年JC更銳志成為演員，誓要跳入大銀幕！

憑衝勁想做就去做

為了專心發展演藝事業，JC毅然放棄在港的模特兒工作，到美國重新開始！作出如此重大決定，難道JC就不怕港人會把她遺忘？「我冇諗過，我只係覺得自己想做嘅嘢，就一定要做！只要你有熱誠，夢想就自然會成真！」她就憑着這股衝勁，到美國開拓自己的新天地，積極參與不同的電影試鏡。「試鏡唔係淨係睇你嘅外貌，即使你好有天分，但如果你喺試鏡嘅過程中表現唔到出嚟，都係徒勞無功。所以你一定要時刻準備好自己，做到得心應手！」

離港差不多一年，JC的事業彷彿沒有太大進展，更有報道指她於美國「零工作、零收入」！面對種種閒言閒語，JC一於少理，繼續向目標邁進。雖然她的演員夢暫時尚未實現，但卻為她賺來不少私人時間，好好享受悠閒的生活。「喺美國，我有多啲時間瞓覺、多啲時間做自己想做嘅事。喺香港，就有排山倒海嘅工作，連休息都冇時間！我覺得呢個平衡好重要，令我知道一切唔係理所當然，會更加珍惜！」

美國為善幫助動物

一向喜歡動物的JC，於美國參加了幫助動物的慈善機構，讓被遺棄的狗隻暫時寄住於她家中。她笑言這不但能回饋社會，更可滿足她養寵物的心願。「因為工作關係，成日要周圍飛，養唔到寵物。畀啲狗仔嚟我屋企暫住，畀佢哋關懷同愛，等佢哋對人類有番信心，唔好再怕人！」雖然狗隻令她的家亂得一團糟，但她仍樂此不疲，不時帶牠們散步，又訓練牠們做不同的動作，如伸手、坐下、躺下及在地上打滾。「最高峰有五隻狗仔喺屋企！睇住佢哋慢慢長大，到有人收養佢哋、接佢哋走。見到佢哋有一個屬於自己嘅家，我真係覺得好開心！」

於美國過着悠閒的生活，但JC亦不忘定時返港「撲水」！每逢回港，她的工作都定必排得密密麻麻。雖然毫無歇息的時間，但她卻得到夢寐以求的電影演出機會！面對這麼大的落差，她亦坦言香港的一切來得較容易，令她十分感恩。「香港係一個令我覺得好神奇嘅地方，喺呢度有fans，有人欣賞我！我以前做嘢，只係為咗屋企人，但依家係為咗唔好令支持我嘅人失望！」

她深明要成為一個優秀的演員，除了感情要投入角色外，仲要有百足咁多爪！要飾演一個音樂家，你要學彈得一手好鋼琴；要飾演一個舞者，你要聞歌起舞。JC為了演活《熱浪球愛戰》中沙灘排球手一角，事前專誠學習排球及拳擊。「學打沙灘排球嘅時候打到瘀晒，又畀猛烈嘅太陽曬到黑晒、甩晒皮。雖然好辛苦，但係一個好好嘅經驗！我好鍾意呢種一關過一關，排除萬難嘅感覺！」

JC最愛黐假眼睫毛，因為令雙目更有神。

JC笑言香港是她的福地，給她帶來名與利。

一見鍾情主動出擊

JC與模特兒男友Sergio一向愛得高調，出席公開活動或接受訪問時都相依相偎、大方咀嘴，sweet到不得了。JC大爆自己對他一見鍾情，更主動展開追求！「我同佢第一次見面係喺新加坡。一見到佢，就已經畀佢嘅外表吸引住。有一次我哋去party，飲咗一杯酒之後，個人大膽咗，就同佢講『我鍾意你』！」

感情發展一日千里，但二人因工作關係，聚少離多，到底是如何維繫感情？JC竟笑言：「佢喺身邊嘅時候，反而少傾偈。因為會覺得佢喺度係理所當然，唔會去珍惜。但佢唔喺度嘅時候，就會好掛住佢，一有時間就要打畀佢傾偈！」

着重眼妝愛假睫毛

作為名模，時常要化上不同的妝容，出席不同的公開活動，時刻以最佳狀態示人。JC笑言自己最着重眼部化妝：「我好鍾意貼假眼睫毛，因為可以令對眼睇起嚟更有神同性感，增加女性魅力！之前我做過化妝品品牌shu uemura嘅模特兒，試咗好多誇張嘅眼妝，令我印象好深刻。真係好欣賞香港人有咁開放嘅思想，能夠接受到咁前衞嘅造型！」

採訪：龔凱欣　攝影：林楠

化妝：Alice Chong @ shu uemura

服飾：SHIATZY CHEN、ALDO