玩得Online Game，都係想升Level打大佬，完成副本任務收集裝備。唔想挑戰任務時被Boss「屈機」，除了日煲夜煲外，今次仲有多一條出路，就係自己變成大佬！Gameflier剛開放公測的MMORPG《魔界Ⅱ Online》，玩家只要接受特別任務，就能變身成平時喺遊戲屈你機的Boss級大佬，仲可以用他們的招式四圍作惡，都咪話唔過癮。
撰文：李潤康
平時單挑副本任務，未升夠Level就遇到大大件的Boss，當然只能立刻逃生，但今次就剛剛相反，《魔界Ⅱ Online》有一個名為「Boss回憶」的副本，任務裏玩家可以變成不同魔軍的Boss，如死靈戰將索雷德、蛛后維婕莉娜、自然制裁者雷娜等。小記試過變身做死靈戰將，可隨意使用他的4大強勁技能，四圍「蝦蝦霸霸」後，輕鬆破解手下將領的封印。
除了新副本夠創意外，遊戲設定亦於人類、精靈、希爾芙、克雷婭4大種族外，加入隱藏種族潘塔。職業是武者的潘塔族，熊貓造型略為發福，精通虛空掌、混元勁等東方武技，令人一看就聯想到《功夫熊貓》的阿寶。講明係隱藏，當然要付出一點代價，玩家要先選擇其他種族，升到60級後才會出現潘塔選項，不僅如此，玩家還要由零開始，重新訓練這隻武者熊貓，練功實在唔簡單。
遊戲內有一個名為靈魂石板的東西，包含了符文鑲嵌、月光寶盒和鑒定封魔石3種功能，分別用來增加裝備威力和合成寶石，最有趣是鑒定封魔石設定，玩家要先學習封印技能，然後與指定怪物戰鬥，成功將它們封印才能獲得封魔石。這時玩家便可鑒定封魔石，將它們變成怪物卡，將怪物的特點和屬性植入自己的武器及防具。又捉怪又鑒定，玩落真係有啲寵物小精靈Feel。
類型：MMORPG
開發：上海金酷遊戲
平台：PC
代 理：Gameflier
推出日期：正進行公測
網 址：http://mw2.gameflier.com/