DoCoMo SH-12C日系解Phone

日系手機向來樣靚身材正，而且功能永遠走在最前，小記不少朋友想試用；可惜一提到有SIM Lock，上唔到網兼打唔到中文，就幾靚都唔想轉。直至DoCoMo SH-12C出現，以上問題終於解決，皆因它冇SIM Lock限制，香港SIM卡都能直插直讀，而且上到網兼可拍裸眼3D片，功能超強都只係賣五千幾，轉會是時候了！

加入自家TapFlow UI，只要輕觸「3D」Icon即睇立體。售價︰$5,380

先天冇SIM卡鎖

日本電訊市場一向限制多多，手機都加入SIM Lock，不能自由轉台。然而，隨着SoftBank搶得iPhone經營權後，DoCoMo在Smartphone市場大落後，為此DoCoMo宣布於今年4月1日起取消SIM Lock限制，SH-12C便是其中一部受惠手機。實測所見，它毋須軟解或Hyper SIM，只要如普通手機般插入SIM卡就搵到網絡，3香港照樣認到，設定APN後還能用3.5G上網，前所未見咁方便！

毋須Hyper SIM解鎖都收到香港網絡！

下載日本Apps

以往日系機好多時都讀唔到中文，即使讀到部分漢字也會變成亂碼。雖然新機只提供日、英介面，但由於Android 2.3已預載多國語言，因此無論短訊或網頁都睇到中文，用戶還可經Android Market下載中文輸入法呢！此外，以前解鎖後很多日本本土功能都用唔到，但SH-12C沒有此限制，例如Sharp的特賣場GALAPAGOS SQUARE就暢通冇阻，可以直接下載Apps、3D遊戲及試片，為手機無限增值。

裸眼3D夠舒服

近年很多手機都轉用雙核心處理器，但其實真正支援的程式不多，SH-12C不跟風，反而聰明地把單核心處理器提升至1.4GHz，配合512MB RAM，上網打機都勁流暢！另一抵讚是它支援裸眼3D，既提供立體Menu，更配備雙800萬像素鏡頭，能把左右兩邊影像處理，再輸出成3D相或720p立體片。拍攝後更可調校立體強弱，甚至可將3D相變回2D相，保證不會睇到眼花。