近幾天，寫過了24安士加拿大T骨牛扒、層層疊鮮果拿破崙、重量級火燄雪山……品嘗時候當然興高采烈好味道，但實不相瞞，撰文期間腸胃已告支持不住，正處於休養狀況。朋友G海南雞飯宴會，好友A自助餐邀請，惟有一一推掉。寫飲食的人，文字的繽紛與現實的困境間中是會出現矛盾的……
飽滯，可說是一種「暗病」，不好宣之於口，只適合暗渡陳倉，那句「呻窮莫呻飽」像老孫頭上的緊箍兒，提示我不能輕言吐苦水。與某飲食行家J閒談兩句，提到脾胃不適，她像找到知音地訴說：「我都係咁呀！星期一要試食幾輪搞到太飽，竟然滯咗三日……我哋年齡真係唔細啦……又唔好意思話辛苦，因為食嘅嘢全部都係好嘢……人哋聽完只覺得你喺度晒命……」所以呢，我們這行業，幾飽滯都好，亦要預留少少空隙，讓眼淚向肚中流。
我滿以為「不呻飽」已經是好有品，怎料一山還有一山高。某次與一位前輩飯聚，我職業病發作，說這條菜不好味那條菜太難吃，她立即Stop我：「唔好再咁講！要講都靜靜哋講！你要明白，有好多人日日夜夜都食呢類食品……」再同意不過！試想一下：當閣下辛勞工作後終於可以輕鬆扒飯，旁邊卻有人說：「好差！好垃圾！點食得落！」你有何感受？真係幾Hurt。
可惜的是，時下仍然十分流行踩得盡情、罵得痛快的食評文化，大眾受到薰陶，用餐時不免肆意潑罵，唉。
旅遊飲食寫作人