手指扮棍 iPhone鼓添樂

《太鼓之達人》遊戲長年人氣高企,原因是玩法簡單,就算唔多打機的少女都識得玩,之前更入侵iOS平台,可惜只能在日本App Store下載,所以當近日推出英文版《Taiko no Tatsujin Plus》時,連續幾日都登上Free Apps下載榜第一位!其實以現時iPhone 4高畫質加靚聲,十分適合玩音樂遊戲,以下就推介幾款讓各位過癮一番。

撰文:布偉倫

《Magic Piano》扮郎朗彈Lady Gaga

唔知剛獲頒英國皇家音樂學院博士的郎朗,彈奏Lady Gaga《Poker Face》有冇火花呢?雖然今次並唔係郎朗真人表演,而係學佢玩《Magic Piano》鋼琴App,但用家真係可以跟住畫面的光束彈奏流行曲。就以《Poker Face》為例,只需65個代幣下載,計落都唔使1美元,而且仲可選擇螺旋形或圓形的鍵盤,兼且可以Share畀人睇你彈得幾好。

《Taiko no Tatsujin Plus》新版玩連線

遊戲用上日文譯音,其實即係大家玩開的《太鼓之達人Plus》。它由PlayStation玩到落手提遊戲機再移植至iPhone,都係靠跟節拍打鼓面及鼓邊取分。新作畫面跟到足外,內容亦全面提升,增設無線對戰功能,唔使再一個人對住部iPhone玩咁悶。預載3首免費歌曲畀大家,其他歌曲都要付費購買,現時已推出4個Pop Song跟1個Classic Song套裝,每套賣成4.99美元呢!

《Tap Studio 3》4人連線鬥Tap

App Store不難搵到大堆以「Tap」字行頭的音樂遊戲,當中最多人玩的肯定是《Tap Studio 3》,已經有超過300萬個下載。玩法相當簡單,校啱時間對準波波一Tap就得,自製歌曲時更可選擇3條或4條軌道挑戰自己。遊戲的支援性亦做得不錯,能下達及接收戰書,更支援Game Center上4人同時對戰。

《TO Dance》3D勁舞

懷疑自己玩緊《勁舞團》?其實《TO Dance》是一款按Timing篤畫面的音樂遊戲,但就新鮮啲加入唔同造型的角色起舞,如果Tap得好的話就會轉新舞步,角色更會Show off超強舞姿。遊戲設有3個3D場景,視覺效果頗出眾,加上每個場景都有一個隱藏角色,總計可玩到6個角色,以免費Game來說相當不俗。

《Arcade Rocker》似Guitar Hero

《Guitar Hero》當年橫掃家用遊戲機平台,這款同樣以結他為題的《Arcade Rocker》App就做得似模似樣,玩法以Tap形式掃Chord。還識得自動從資料庫找出對應的Gameplay資訊,最常玩的3首歌更可免費任玩,但如想玩埋系統資料庫內其餘12,000首歌,就要乖乖付款下載。