80後為食少爺Tony Cheng

撰文︰陳志滔 部分攝影︰梁偉德

記：記者 鄭：Tony Cheng

《輕鬆學茶藝》 李洪編著，介紹泡茶方法、茗茶心得，文字生動兼多圖解，是認識茶藝的入門法寶。

每次搬家Tony都帶着這部Shule壓麵機︰「這部機我15歲買落，見親朋友都會用佢整Pasta！」

啟蒙自Jamie Oliver

記︰為何這麼喜歡入廚，樂趣何在？

茶之香 Tony推介的茶葉品牌，又名Essense，專營白芽紅茶、茉莉龍珠茶、波斯紅玫瑰及宮廷普洱等多種茶葉。

《Jamie Oliver The Naked Chef》 Tony的啟蒙烹飪書，書中都是靚仔英國廚師Jamie的食譜，強調保留食材原味。

鄭︰記得第一次入廚是14歲，當時在英國讀書，天寒地冬冇啖好食，一天忽發奇想不如入Pantry自己整嘢食。那年頭興Jamie Oliver，我就跟着他那本烹飪書學整燒雞，煮完意外地班Friends好Like，過程中大家嘻嘻哈哈，感覺好Warm，從而啟發到原來美食可為人們帶來歡樂！

畢業後我在麥格里及投資銀行工作，從中了解到一間公司的運作方法，儲夠錢後我就離開金融界去羅馬尋夢。那時先到米芝蓮餐廳All'Oro，邊學師邊觀摩，之後回港再拜名廚Roland Schuller門下，學滿師便開設第一間餐廳The Drawing Room。

記︰The Drawing Room榮獲米芝蓮一星殊榮，為何當初選做意大利菜？

鄭︰談到歐洲佳餚，很多人第一時間想起法國菜，但我留意到中國人較多吃澱粉質，所以有飯有麵的意大利菜，更貼近香港人口味。至於米芝蓮我就冇刻意經營，沒有花費太多裝潢，但就把45%營運成本都放在食材上，因為我深信一間成功的餐廳，只有把食物永遠放在首位，客人才會回味再訪。

記︰為何突然另開海南少爺，賣海南雞飯呢？

鄭︰好多香港人都鍾意食海南雞飯，但平價的唔正宗，正宗的價錢又貴得嚇人。我開設海南少爺是希望以合理價錢，讓饕餮們吃到美味的海南雞飯。記得當初構思時，我曾遠赴新加坡取經，一星期食足18餐，由雞油、雞飯，再研究到黑醬油、薑蓉及辣椒醬，全部做晒筆記。我深信既然海南雞源於中國海南島文昌市，冇理由會做得差過人哋。

品茶與運動成興趣

記︰聽說你最近在研究茶，有何得着呢？

鄭︰茶就跟紅酒一樣，愈學你會發覺愈唔夠，單是茶葉、茶湯、茶底及茶香的優劣，就已經有排學，實在是博大精深。茶葉按顏色及發酵度，可分為綠茶、紅茶、青茶、黃茶、黑茶等幾大類，當中我最愛喝湖北青茶，鮮爽回甘，茶香撲鼻，喝時令人身心放鬆，好Relax。

記︰除了食，你平時還有甚麼興趣呢？

鄭︰哈哈，除了食我真係冇乜特別興趣，我連旅行都想去全球最佳食府Noma偷師，就知我有幾為食啦！不過，我都愛做運動，好似之前冇咁忙的時候，我會打Golf，球桿會揀Mizuno，因為是日本製，所以重量和尺寸較貼合亞洲人身形。只是最近較忙，為了慳時間就多去Swish Club打泰拳，每次打完都流到一身汗，濕氣盡消！