Rockstar Games又有新作，但唔係《GTA》這些周圍殺人的冒險遊戲，反而筆鋒一轉，在《L.A. Noire》扮演40年代探員去伸張正義。雖然遊戲不能像現實般用刑向拉登信差逼供，但卻引入有趣的MotionScan系統，將真人表情加入角色之中，玩家要靠疑犯的面部細微變化，判斷信或唔信證供，想破案既要耐性更要觀察力！
《L.A. Noire》故事發生在1947年的洛杉磯，開發小組為了重現40年代洛城面貌，事先作出不少考究，淨係睇場景設計同角色衣着已充滿電影感。遊戲以洛城女演員被殺分屍的真實案件「The Black Dahlia」為主軸，早年《艷屍案中案》電影就係講這個故事。單一兇案主線較薄弱，所以遊戲加入不少同年代的虛構罪案支節，等開頭只係散仔的探員Cole Phelps，透過查案紮職。
美軍追殺拉登花了不少時間逼供、打聽同確認，才找出信差真實身份，遊戲中都要花心機去現場搜證及盤問證人。犯人當然唔會一問就認罪，但有些細微動作或會露出他們的意圖，遊戲特別用上MotionScan技術，以32個鏡頭拍攝專業演員的表情變化，然後加進模擬角色內，可親眼睇到疑犯被盤問時的情緒反應再下判斷，主角選擇相信、唔信或質疑指令後，都會影響故事發展。
雖然唔似《GTA》可隨街開槍和撞人，但《L.A. Noire》的自由度都唔低，查案時可以揸警車飛馳，但要小心唔好撞親人或者撞爛嘢，否則要賠醫藥費同維修費。同樣地，遊戲主角係探員唔係土匪，唔可以見人就揪，就算遇到持槍犯人都只可以逐步推進，真實感較強。雖然最初做散仔時，要破的案件只屬碎料，但遊戲會畀足提示玩家，只要接近重要證物時，會響起特別音效提示。惟要留意遊戲係要點出洛城的黑暗面，不時會有血淋淋的屍體出現，玩時要畀足心理準備！
類型：懸疑推理
開發： Team Bondi、Rockstar Games
平台：Xbox 360、PS3
推出日期：5月20日
售價：待定
查詢電話：2359 7998
撰文：布偉倫