11.6吋Alienware異形燈陸

Dell Alienware系列向來以強勁硬件見稱，能滿足到對圖像處理要求極高的專業玩家。雖然被喻為「宇宙最強」的18吋新機M18x仍未供貨，但同系列最細的11.6吋M11x經已現身，配上新一代Core i7處理器及GeForce顯示卡一樣有睇頭！難得係新機只重2kg，要帶住部機四圍Show off都方便好多。

售價：$11,999

獨立調校背光燈

Alienware系列外形向來突出，一見「外星人頭」標誌實唔會認錯。以往其機款均以黑色設計為主，但到M11x卻出埋紅色款式，望落去更醒神。新機更可透過《AlienFX》軟件將發光位置獨立調色，唔使由機前「車頭燈」到背光鍵盤都紅噹噹，機背外星人雙眼仲識發光，要每日轉色氹自己開心都冇難度。睇外形都知，M11x以重裝上陣，一般Netbook可造到1.5kg以下，而M11x重量為2kg都唔算負磅太多，帶出街使用冇太大影響。

在家可用HDMI或DisplayPort輸出至大電視或屏幕打機。

強勁硬件打機播片

新機配上第二代Core i處理器，可選擇Core i7-2617M或較低檔次的Core i5-2537M，後者入手價由$9,999起，頗為吸引，不過叫得做「宇宙最強」系列，當然要揀番頂級Core i7處理器。此外，想打機打得順，好大程度要靠顯示卡的功力，M11x就用上雙顯示卡設計，一般上網工作可用內置Intel HD Graphics 3000，當玩3D遊戲或播高清片時，就可轉用GeForce GT 540M獨立顯示卡。

小記即場用M11x播全高清片試機，結果當然流暢到不得了，惟11.6吋屏幕只屬720p規格，未能點對點顯示全高清，雖然畫面都幾Sharp，但稍嫌略為反光。音效表現方面，除可用內置WavesMAXX音效卡外，亦備有Klipsch喇叭強化音效，還可以HDMI輸出至7.1聲道音響系統，玩盡多聲道影音效能！

M11x有齊讀卡器和IEEE 1394端子。	M11x機背線條特別，「外星人頭」亦會發光。	《AlienFX》可設定「外星人頭」開關燈、鍵盤背燈等。
鍵盤預設紅色背光燈，可以利用《AlienFX》轉換成白色，夠晒Cool。	11.6吋屏幕畫面清晰，但略嫌有少許反光。