周汶錡搵Vintage吊味

幾時開始對時裝有興趣？

細細個已經開始對時裝有要求，鍾意紅色、鍾意啲好Sharp、好鮮艷、好靚嘅嘢，最鍾意One-piece裙，鍾意啲好女仔嘅嘢，要自己揀衫同襯衫，仲會幫埋細佬揀，細妹就唔使喇，佢着番我啲衫就得。爹哋媽咪對時裝嘅要求一直都係重質不重量，我亦都受到佢哋嘅影響。

入咗行後對時裝興趣更大，愈嚟愈有經驗，愈清楚自己嘅Style，唔止係時裝，仲有髮型、化妝，成個Total look，整體混合出嚟嘅成績。初入行時咩都買，嗰時係重量不重質，之後大個咗就變成重質不重量，投資重咗，但就買少咗。

拒絕花巧

最鍾意點樣嘅衣着打扮？

兩個極端，平日鍾意Casual打扮，Ｔ恤牛仔褲，舒服嘅平底鞋，但夜晚一定要着番對高踭鞋，我好鍾意高踭鞋。我必備嘅服飾係一件黑色西裝褸、牛仔褲、Ｔ恤、高踭鞋、平底鞋同One-piece。

Vintage係一個尋寶嘅地方，係好重要嘅時裝元素，冇咗Vintage就會失色，現代加復古嘅Crossover係我好鍾意嘅打扮，呢個係我一個小小嘅配襯貼士，除咗獨一無二，仲會令成個味道更加突出。

你嘅穿衣之道？

Quality好重要，設計款式要襟興，顏色方面，黑色離不開，好穩陣，最近鍾意白色，感覺好Bright好Sexy。質地要舒服，我鍾意Cotton。太花巧嘅唔係我嘅嘢。

提升品味

會唔會瘋狂購物？

細個就會，嗰時係摸索階段，唔知咩係啱自己，依家唔會喇，只係好間中，偶然一、兩次，通常Out town就會瘋狂啲，我好鍾意買鞋，買高踭鞋，同埋買Top，最癲嘅時候係唔敢計買咗幾多錢。

時裝對你嘅意義？

我本身都鍾意時裝，時裝可以提升自信心同品味，由時裝配飾嘅外觀到Cutting、質料、手工等背後嘅藝術我都有興趣，提升我對品味生活同質素嘅追求。

點先可以提升品味同潮流觸覺？

多睇潮流雜誌，不過唔好盲目，要認清自己想要咩，時裝都講性格，將時裝融入自己性格，堅持自己鍾意嘅嘢，有自己嘅Style，但又要大膽去配襯，要識得將每樣嘢協調，撞擊出火花，所以都唔容易。

貼身褲騷修長美腿，凸顯Kathy的強項。

Kathy對配飾亦講究，當中Chanel更是Kathy的收藏品。

認清方向

覺得自己係唔係一個時裝精？

唔係，好似上季好興毛毛，今季好興Colourful，我唔會放到成身都係嗰啲潮流嘢，身上有一、兩樣就夠，時裝係唔同元素產生嘅火花，要留意Fashion trend之餘亦要留意自己可唔可以Carry到，例如今季興橫間，橫間服裝係潮流但唔係人人都着得好睇，咁可以唔揀衫，揀個橫間袋，又或者鞋，自己最重要係個方向，唔好盲目跟隨潮流。時裝係一個循環，要有眼光地去投資，買嘅嘢先唔會Out。

覺得自己係咪一個潮人？

我唔係一個潮人，潮人係跟個潮流跟到好貼，好大膽嘗試，好誇張嘅嘢都會擺喺身上，潮人要好大膽，但係自己冇咁嘅膽量。

今個春夏的時裝潮流？

好Colourful、會興番喇叭褲、鬆糕鞋、長裙，好70's，可以簡簡單單着喇叭褲襯個好Colourful嘅袋已經好出眾。

唇膏好重要

Kathy認為時裝與化妝不可分割，而今年的化妝潮流亦同樣以鮮色調為主，Dior今季全新的唇膏色澤就是她的心水選擇。她說：「我好注重唇妝，今期興帶少少螢光色嘅唇膏，例如Sharp嘅橙色同粉紅色，畀人一種好清新嘅感覺，淡妝配鮮色唇膏會顯得更白淨、更Cute，橙紅色係我今季嘅主打色。我自己化妝最重視個Base，Foundation切忌太厚，會好假同埋唔夠透明感。我鍾意對眼好精靈，好鍾意搽Mascara，唇膏都好重要，就算唔化妝，搽少少唇膏都靚。」

期待Dior新火花

談到Kathy最喜歡的時裝品牌與設計師，她說：「好多，唔同嘅設計師同品牌都有佢嘅特色，我好鍾意Miu Miu、Celine同埋Givenchy，我鍾意嗰個品牌都會鍾意埋個設計師，Givenchy個設計師Riccardo Tisci下季去Christian Dior，相信會有新火花，我都好期待。」

採訪：張嘉敏

攝影：林蔚恩