話說城中某某雜誌快要周年紀念，意圖炮製一個群星拱照慶大壽的特輯，卻找上最不好出風頭的名廚，可謂自尋煩惱。
名廚向來最唔Like拍照，偏偏某某雜誌為了拍周年特輯，提出一個好犀利的構思：以「最後的晚餐」為主題，名廚坐在耶穌的位置，身旁盡是廚房團隊做門徒。餐廳公關小姐將拍攝構思告訴名廚，他立即說：「睬！乜嘢『最後的晚餐』？」一口拒絕。公關小姐冇佢符，惟有轉告雜誌，編輯回覆：「冇問題！我哋再諗諗！」
兩天後，雜誌提出另一個好犀利的構思：整隊廚師團隊走到大廈天台，排列成V字陣型，名廚站在中間（即是V的尖尖），拍出氣勢磅礡。名廚立即說：「邊鬼得閒成隊人約埋影相啫！」公關小姐亦回覆：「大廈天台是尖的，只可站一個人，連攝影師都冇位企。」編輯回覆：「冇問題！我哋再諗諗！」
兩天後，雜誌提出一個冇咁犀利的構思：由名廚拿着寫上雜誌名稱的壽包。名廚立即說：「黐線！」歸根究柢，名廚不明白某某雜誌周年紀念，關自己乜事？點解要佢幫人慶祝？當公關小姐正想推掉拍攝提議，編輯回覆：「冇問題！我哋再諗諗！」最後點？拍一張名廚棟篤企單人照囉。
名廚甩唔到身，向公關小姐呻：「阿女，假如你已經成家立室有兒有女，有人係都要話『要同你搞』，你點呀？你話點呀？唉……」最終，咪求求其其「搞一鑊」囉，呵呵。
旅遊飲食寫作人