任達華靠事業線着出品味
任達華天生一副衣架身材，又是最佳衣着男士，生活有品味，對服飾有要求、有主見。他揚言着衫靚最重要是擁有「事業線」，再加上要從藝術中吸取品味，培育出獨特的氣質。
影帝任達華（Simon）演技突出，無論任何角色，在他手上都能爐火純青地演繹出來，同樣他的衣着打扮，無論斯文、狂野、甚至妖媚，他都能掌握得恰到好處，天生的靚衣架是要後天訓練出來的。與他談時裝，他滔滔不絕，講到穿衣之道，他講明要有「事業線」，因此「線」並不是女人專利，他說：「女士有『事業線』，着衫靚亦有睇頭，但男士都要有『事業線』，當你『事業線』好直，證明你身材好fit，如果有啲彎，即表示你肌肉有啲鬆，要努力keep番，所以做運動一定唔可以少，我就算幾忙，一星期必做兩日運動，出trip做嘢拍戲，一定要帶波鞋，冇地方做運動，都會落街跑步。我係一個寧願多做一個小時運動，亦唔想瞓多兩個鐘嘅人，情願上網睇潮流資訊，都唔會去酒吧過夜生活。」
親自設計感滿足
Simon雖然拍戲日接夜，但對潮流依然能瞭如指掌，對於今季的潮流趨勢，他說：「今季係花花彩色世界、好colorful、性感、好funny，當然長青嘅牛仔系列，今季亦會大行其道，特別係洗水牛仔，無論衫或褲都可以任意配搭。綠色、粉色系列都可以着上身，可以好funky，不過對於男士，最少要有兩套黑色的西裝作百搭，當然可以加啲創作嘅空間，如果想像力豐富，可以試吓自己設計衫，自己mix & match。（你有冇諗過自己設計？）都有試過，以恤衫西裝開始，一般嚟講，恤衫同西裝都係比較千篇一律，大家可以利用自己嘅想像力，每人都可以創作出獨一無二，而且合自己心水嘅服裝，又可因應自己嘅身材來設計，有時間自己設計服飾，都好有滿足感。」
睇展覽提升品味
Simon被問到最喜歡哪一個時裝品牌，他說：「Jean Paul Gaultier、Dior、Gucci係好好嘅牌子，無論款式、剪裁或設計都好靚，只要有好嘅身材，就可以將件衫演繹得好靚。」
就算有衣架般的好身材，也未必能着出衫的味道，如何能將個人衣着品味散發出來？Simon透露他的品味除了從日常生活中吸取外，多留意藝術品亦能提升品味，他說：「我鍾意睇畫展、攝影展、不同嘅藝術品，從中學到好多配色嘅嘢，搵到好多色彩，從而搵到喜好，搵到自己風格出嚟，睇多啲藝術品又可令到自己更有內涵，有修養。另外，亦要留意四周圍，睇多啲時事新聞，世界不停變，每件事物亦不停轉變。我哋買一件衫，唔係只係着上身好唔好睇，我會留意佢好多細緻嘅位置，欣賞佢嘅靚及設計師的創作能力。」
牛仔是永遠長青
Simon緊貼潮流，但不會麻木跟隨潮流，但對他來說，牛仔永遠是長青，他說：「我有好多牛仔褲、牛仔衫，有啲已經幾年嚟一直着住，完全唔會覺得佢out。」被問到會否想到外國睇時裝騷，吸收最新資訊？他表示留意最新的時裝動向，並不需要到外國睇騷，他說：「我從未到巴黎或米蘭睇過時裝騷，覺得睇咗反而被局限，去多咗睇騷唔等於你有品味，亦唔代表你搵到創作靈感，有時反而會抄咗人哋嘅嘢。依家科技咁發達，上網或電視都可提供太多的潮流資訊作參考。」
與琦琦着衫冇交流
任達華與太太琦琦均被公認是有品味、有眼光的最佳衣着人士，兩人又朝夕相對，但在服裝上卻甚少交流，Simon說：「我哋好少畀大家意見，因為唔想影響對方，大家只會互相欣賞，因為始終眼光嘅嘢好主觀，如果邊個講得唔啱聽，因為咁嘅小事而吵好無謂，不如畀大家多啲空間，尊重大家的喜好，享受自己的樂趣，如果平日見到適合對方嘅物品會買畀佢，咁更有情趣。」
家庭第一假日陪囡囡
眾所周知，任達華是廿四孝老公及爹哋，無論工作如何忙碌，他如何熱愛工作，家庭永遠排第一位，他說：「我家庭觀念好重，平時好少夜生活，拍完戲返屋企陪女。以前未有囡囡，太太又忙成日飛，會有多啲時間做自己嘢，但有咗個女之後，一有空就想陪佢多啲，所以盡量睇吓星期六、日可唔可以放假，有家庭樂日，就算唔得，每年都會抽空一家去旅行，好似農曆新年就一定會放假陪佢哋。」
採訪：Jessica Lam