尖咀一舖兩格 露天位享峇里Feel

布置懷舊型格

任誰路過「千福大少」，或許都會以為它是家具店，這前舖有一大塊落地玻璃，將店子與街道分隔開，分外寧謐，引進的自然光，可讓大家悠閒、盡情坐一個下午，而擺設則似足家具店，餐廳老闆Sam特別從日本、峇里及泰國搜羅椅子、梳化，配襯兒子Jason的畫作、仿古紙皮石地磚，以及從舊船拆下來的木板牆飾等，散發陣陣懷舊氣息。

至於隔鄰的另一邊舖，氣氛就截然不同，燈光昏昏黃黃，再配襯懷舊味的Designer Chair及幾張餐枱，甚有情調。仿古紙皮石地磚及牆上的特大畫作，則秉承前舖格調，這裏晚上會變身酒吧，餐枱因而經過特別設計，例如用餐時調高枱面，飲酒時則拿開活動枱面再降低即成，跟這裏裝潢同樣靈活百變，甚為貼心。

餐廳設有露天位，以峇里來的家具，配合一片青葱，感覺悠閒。

另一邊舖較Moody，夜晚會變身酒吧，餐枱經過特別設計，可隨時調高降低，食飯、飲酒一樣得。

法國直送甜點

喜歡坐露天位的話，這裏亦能滿足大家。以峇里運來的戶外家具，配搭一片青葱，鬧市少見，正好歎個下午茶，咖啡是以瑞士名牌Mövenpick咖啡豆沖泡，味道天然，香氣撲鼻，還帶點回甘，有Cappuccino、Latte、Mocha等大路選擇，還可選Caffe Cocktail。至於甜點，則是法國名牌Parisaveur每天直送來的精選，款式有Macaroons、Triangle Chocolate Cake等，味道不錯。

甜點以外，這裏亦有十多款飽肚美食，熱賣的有大少海南雞飯及咖喱牛腩飯，前者以皮薄嫩滑的清遠雞，用滷水料浸6個鐘至入味，配雞油飯食一流；後者則混合牛腩的牛翼位及坑腩炮製，Sam還有經營火鍋店，搵靚牛冇難度，咖喱汁小辣，卻有豐富的香料味，食味富層次感。

若是夜晚來飲酒傾偈，這裏有單一麥芽威士忌、紅酒及不在酒牌上的雞尾酒等，全是店方心水推介，三五知己摸住酒杯底聯誼，感覺Relax。

Triangle Chocolate Cake $32 似Opera餅有幾層質感，黑朱古力、脆餅及慕絲等，味道濃郁。	千福大少炒飯 $68 炒飯賣相吸引，飯粒亦炒得乾身，配料有青豆、蝦仁、瑤柱及肉碎等。	Macallan Malt 18years $98/杯 醇厚的威士忌，甚易入口，加冰或淨飲都不錯。
大少海南雞飯　$68 雞肉嫩滑入味，雞油飯、雜菜湯亦甚有水準，醬汁經精心挑選：新加坡名牌ABC豉油、混合泰國豆醬的薑蓉，以及酸甜醬，令這美食更有睇頭。	Warm Chocolate Cake $28、Cappuccino $34 這經典甜點，透出濃郁的朱古力香，襯埋杯靚咖啡冇得彈。	Macaroons　$10/件 每天由法國新鮮運到，味道包括檸檬、開心果、雲呢拿、朱古力及咖啡等，入口不黏牙，甜度適中。
咖喱牛腩飯 $58 大廚先以柱候醬蒸新鮮牛腩，再混合用多種香料、薯仔炮製的咖喱汁，小小辣味道香濃。

撰文：楊淑英

攝影：林資凱

模特兒： Trater、Winkie（M.SPY）

查詢電話：2312 6686