薛凱琪隨意新裳試
薛凱琪（Fiona）初入行時是少男們心目中的甜心，時至今日，Fiona那份甜蜜蜜未有過期，雖自言着衫只奉行隨意兩字，不盲目跟風，卻是冥冥中無為變有為，把可愛及女人味crossover，成就了child woman這個身份。
隨隨意意，也可找到「新裳試」。包括有次Fiona出街時才發覺天氣很涼，但又找不到合適的衣服來加衣時，想起要買新床笠，遂買張素色的床笠然後當披肩用，誰知效果奇佳，人家還以為是最潮的披肩！
唔想定型
「我着衫真係睇心情，從來唔會刻意局限去走咩路線、跟咩形象，我唔怕咁樣會令自己唔夠unique，一向藝人都有好多類型，好似Lady GaGa或者Katy Perry咁好鮮明、有自己signature，但有啲藝人好似我咁，唔想被人定型。因為我想畀人感覺係向多方面發展，所以着衫都係以多變、free啲。」
極端主義
「無論着衫或化妝，都係熟能生巧，當你一日因為要做好多個訪問而預備八套衫時，襯得多試得多就會得心應手。當然要了解自己身形有咩優點同缺點，我膚色黑、膊頭窄、大髀粗，着one-piece裙係最好選擇，但唔會揀瘀紫瘀藍色嘅衫去着，否則死梗！因為我係讀art出身，所以化妝好易上手，我習慣喺搽eye shadow時，盡量唔會用咁多顏色，又或者eye shadow淡啲，但唇色就好鮮色、極端啲，因為我想畀人睇清楚我個樣，太多色會令人更加老，唇膏顏色同着衫顏色都係一樣要咁極端，一係好接近膚色，一係就好sharp。」
買衫環保
看Fiona那份timeless、猶如精靈般的嬌滴滴，以為她自小已是愛美一族，但她卻說自己是上大學才開始打扮，原因是冇校服着。「中學時真係好醜樣，我着住條長到過晒膝頭、阿媽諗住可以着幾年嘅校裙時，對住嘅係一班條裙唔及膝嘅同學，可以知道我有幾土！就連籃球隊長都走埋嚟笑我唔識扮，真係可想而知我又幾咁醜。入U冇校裙着，又冇理由日日着同一件衫，先至開始識得打扮。」
衣櫃裏有甚麼衣物，就代表她和他是怎樣，Fiona說買得最多是knit wear。「我成日覺得，一個長髮女仔着住knit wear襯牛仔褲，把頭髮散落件knit wear度，真係畀人一種好想去擁抱佢嘅感覺，哈哈，冇錯，就好似Meg Ryan嗰類咁。所以我唔單止多knit wear，仲有白tee白恤衫同sun dress。有人話藝人買衫好唔抵只着一兩次，但我買衫就係因為唔會刻意去跟風，反而係以實用環保為主，唔同襯法，增加可着性。」
唔買貴袋
「人哋話女人最緊要係手袋同鞋，我真係有好多鞋，至少過百對，咩款都有，但我買鞋好似買衫一樣咁極端。例如買boots，一係要好短，一係要好長，長度極端啲，先顯得對腳長，而涼鞋一定係全部平底，一有踭，就唔係嗰件事。至於手袋，好老實，名牌手袋根本係炫耀居多，尤其當我返內地拍劇，見到好多人好窮衣着好樸實時，你就會覺得買個幾萬蚊嘅袋，真係好折墮！」
無視批評
藝人的衣食住行舉手投足都被注目批評，Fiona直言從來無視傳媒找時裝設計師來批評藝人衣着的文章。「我唔會為啲衫評而唔開心，有時係評論者本身唔喜歡某種style，所以當藝人咁着嘅時候，就好自然會批評話唔好睇。就係因為我認為打扮係隨心情，所以我搵唔到薛凱琪着衫有咩dark age，唔會覺得邊段時間着得肉酸唔想提，就算係着得核突，都係代表緊我當時嘅心情，之後睇番咪當自己當時好可愛咁襯囉！」
「有時我會諗，咩叫fashion，係咪推出一啲product出嚟去follow就係叫做潮？Andy Warhol以前嘅名模女朋友Edie Sedgwick曾經講過，話fashion界每年都係一班人嚟開會，然後度吓有咩潮流，但會上嘅人都根本唔知自己做咩，只係講幾句就做咗決定，然後推出產品去迷惑觀眾。我唔可以話自己好清高，有啲hot items啱嘅都會買少少，但唔會因為人有我有心態而買。」
8年蛻變
入行超過八年的Fiona，形象及衣着上也經歷過不少變化，由長髮少女到剪男仔頭，因而被冠為長頸鹿的外號；由紅搭黃或玩透視，到今日終有自己的一套。
最愛哥哥
Fiona眼中time less的潮人，哥哥張國榮一定是其首選。「哥哥係我一家三口嘅偶像，喜歡到佢出一碟要買三隻，大家唔使爭慢慢聽。哥哥型在唔單止靚仔，係當中嗰份自信。而舒淇雖然唔係歌手，未必好似我哋咁試咁多新嘢，但係佢犀利在無論去首映或平時出街，都有嗰份自然同自信出嚟。」
人衫合一
攻讀裝置藝術出身的Fiona，在芸芸牌子中，對Viktor & Rolf情有獨鍾。「好記得有次呢個brand嘅show，model身上係set晒鐵架就咁行騷，成件事係人衫合一，成件art pieces咁，其實fashion都係一種藝術。」而Vivienne Westwood西太后的玩味作風，也令Fiona既佩服又喜愛。
採訪：蔡穎怡
攝影：黎志輝
髮型：Kurt @ Hairs Stage
化妝：Jessica Chan