Titi Kwan菲常傑作
每次提到Titi Kwan，其名字必跟王菲連在一起，一直擔任王菲唯一御用形象設計師，無論她拍唱片封套或開個唱，或者來港購物或到巴黎，Titi Kwan一定形影不離。中文名為關榮恩的Titi Kwan（暱稱阿Dee），其實是首個最早在巴黎時裝界發展的中國人，人脈廣結令他在時裝界十分吃香。不過，阿Dee的終極夢想，卻是六十歲時當牧師去。
阿Dee跟巴黎的緣分，源自十四歲時往巴黎投靠在當地當車衣女工的姐姐後，驚覺巴黎和香港的時裝文化的差異，更觸發他對美的鑽研。十八歲時阿Dee到巴黎出名的髮型屋Mod's Hair打工，眼見老闆只接一個廣告負責化妝的工作，酬勞已是他一個月的薪金，故他入讀巴黎著名化妝學校Christian Chauveau。
之後，阿Dee入讀巴黎三大時裝設計學院之一的Studio BerCot，現時聞名時裝界的Martine Sitbon、Isabelle Marant等更是其同校師姐，故更為阿Dee結下和巴黎時裝界的不解之緣。難怪Martine Sitbon剛在巴黎發布2011秋冬系列，阿Dee看中其中一件作品，只是一個電話，便立刻送到，成為王菲香港站個唱的其中一件歌衫。
阿Dee說：「今次個唱係使咗好多橫手，Martine Sitbon係我大師姐，佢老公又叫我做阿仔，今次我詐嬌，同佢哋講：『香港好凍，落緊雪，快啲雪中送炭啦！我知你哋仲賣緊，但我想要！』佢好快咁話：『阿仔，乖乖乖，即刻送嚟！』」
為超儀做200萬婚紗
阿Dee直言性格被動，解釋不到為何在巴黎有如此多的機會。「好多嘢都係無端端咁嚟，唔知點解咁信我，係命中注定，真係好怪。幸運係一定，但點都要保持番質素，由細到大都好驚冇嘢做，所以每次有機會嚟都會好緊張，好驚冇下次。」阿Dee笑言所接的工作都是「杰嘢」，包括去年接到一個相識多年、品牌Blaak主理人Sachiko Okado電話，要在72小時內為其秋冬時裝騷當Show Co-ordination Director。
由於阿Dee每次把「杰嘢」化為「傑作」，口誦相傳，令不少時裝人對其加深認識，故要求完美的阿Dee要找靚布靚材料，真的很容易。就如阿Dee為何超儀設計價值超過二百萬元的婚紗，婚紗上的刺繡是Chanel御用、法國國寶級刺繡品牌LeSage負責，巴閉之處是這襲婚紗是品牌第一個Chanel以外的設計師合作。
巴黎賣衫火速售罄
阿Dee在港初做D-mop買手，獨具慧眼引進不少牌子到港，加上擔任王菲的形象指導，以及跟不少天后天王合作，包括曾替陳奕迅的大碟擔任形象設計，以多功能來形容所言非虛。直至兩年前，阿Dee正式成為時裝設計師，在巴黎發表三個個人時裝系列包括「Homemade Fairies」、「RIBBON DANCE」及「A CHINESE GHOST STORY」，並於巴黎名店Maria Luisa售賣，不到一星期已火速售罄。
「之前都係因為幫阿菲做嘢，買落好多布料，點知佢話要休息唔撈，成屋都係布點算？所以我攞嚟做設計。為呢個系列我用咗三年去洗腦，當時所有時裝雜誌同節目唔睇。雖然洗腦係辛苦，但其實我唔係好鍾意去睇時裝雜誌，好抗拒接觸呢啲資訊，我唔需要付出咁大努力去了解時裝現象，要pick up好容易，但冇咁大興趣。」
名人明星去到邊都一身品牌，但有人認為他們卻是show case，失去每件時裝背後的意義，未懂mix and match的真諦。阿Dee卻說：「係人哋嘅事，我唔會理。但起碼我唔會要我嘅藝人去做呢樣嘢。例如阿菲個騷，係有好多牌子approach我，但我要尊重成個演唱會嘅concept。我都想淨係逗份人工，跟住叫你今場着呢個牌子，下場着嗰個牌子，不知幾爽！但我唔會玩呢個遊戲，揀衫我唔會睇牌子。造衫嘅過程係好有滿足感，車工同剪裁嘅師傅都做到，呢個係佢哋嘅辛勞。」
因鄧麗君之死結緣
談到和王菲的緣起，阿Dee以一句「好奇怪」來開首。他說：「我未讀完時裝設計返嚟香港就識佢，之後佢去巴黎又會搵我。鄧麗君死嗰時，我咁啱返香港，問佢鄧麗君死咗點睇，阿菲話：『唉！我冇心情，搞到我唔知着咩衫影cover，你幫我諗啦！』就係咁樣開始，幫佢做《菲靡靡之音》隻碟。」
「阿菲份人大事化小，小事化無。有次佢出記招唔知着乜，見到我着住件冷衫，就話要着，其實件冷衫我着咗成個月。有次佢去馬來西亞開騷，個髮型師唔舒服上唔到機，助手又唔記得帶袋鞋。阿菲唔想個助手畀人炒，當時我叫佢赤腳，個髮型點算？哈，阿菲真係好好彩，連個天都幫佢，因為當日落雨，我叫佢濕頭上囉，成件事就係咁自然。」
阿Dee認為王菲那份獨有的高貴未有變改：「阿菲係一塊靚料，細節爭少少已經爭好遠，同一件衫，阿菲一定carry得比大部分人好睇，但點令佢靚，係我嘅秘密。」
終極夢想去當牧師
隨遇而安、認為工作是「天跌落嚟」的阿Dee，說稍後會洽談一個以環保皮草為概念的計劃，但說到終極夢想，卻是六十歲去當牧師。「我係唔去教堂嘅基督徒，我知道我信嘅方法，一定同弟兄姐妹鬧交！我知天父係邊個，就係因為佢安排我有咁精彩嘅人生，一定係有意思。依家我有好多嘢都唔明，點解要做王菲？點解我做呢個圈？點解我係基督徒？我想我人生經驗豐富啲，到時同大家分享。」
Zing佔有我！
Titi Kwan和著名化妝大師Zing就如兩生花，阿Dee說：「哈哈！第一次返香港做嘢，Zing已經佔有我，我都未試過同第二個合作，就算佢收平啲都要用我。我同佢一凹一凸，好似齒輪咁，佢對化妝嘅熱愛，值得我吸料放畀佢。我好放鬆時，佢就好緊，我懶惰時佢又會鞭策我。佢好知我諗法，我哋傾緊嘢時，外人以為我哋鬧緊交，但其實係一種溝通方式。」
王菲笠垃圾袋
形容王菲為「一塊靚料」的阿Dee，曾想過在王菲今次巡迴個唱中，以垃圾袋示人。他說：「我曾經講過，阿菲就算笠個垃圾袋都靚，我想試十幾年嘞，之前台灣嗰站已經想試，但搵唔到靚嘅垃圾袋，我好肯定佢一定靚！阿菲接受能力好高，只會初時『吓』一聲，兩秒鐘後已經知咩事，如果佢做我助手就好！」