昨天提及，前年我聽從相士指點而臨急跑去百貨店買紅底，結果我只能買下僅餘的紅色T-Back。那個年初一，總覺得坐立不安，周身唔聚財，我用下身的不舒爽，意圖換取來年的大富貴，可惜那年不怎樣如意。從此不玩這「紅底接福」玩意。
讓我澄清：我對T-Back毫無貶意，亦不認為是妖精男子的專利品。記得廿年前年輕時常出入某社區健身室，有位從事裝修的大隻佬師兄告訴我：「剛穿了法國內褲，設計好奇啊！」然後擰轉背，一手伸進股屁位置，再一手抽出三條線連接的三角位，說：「你看！下面得一條線！」在場其他大隻佬都讚：「正！好Sexy！」還嘆道：「你老婆真有福！」我啞晒。但我相信，以其操得勁Fit的「股巨肌」，他老婆應該好有福。
廿年後的今天，一枱人吃午餐，說到T-Back，靚靚太毫無忌諱地討論：「我也買過一條畀老公，不過佢嫌唔舒服。」可見人妻樂見丈夫行性感。在坐時尚女回應：「我都覺得唔舒服，『界吓界吓』咁。」靚靚太糾正：「睇你點揀啫，粗線嘅會『界吓界吓』，幼線嘅唔會，幾舒服o架。」時尚女抗議：「T-Back有舒服呢樣嘢o架咩？」靚靚太強調：「有！仲好靚，喱士邊最靚。」時尚女反駁：「喱士邊仲唔舒服！」靚靚太反彈：「係喱士兩邊唔係喱士下面條邊喎！」
此時，年過半百的餐廳品酒師來了，靚靚太居然問：「你有冇着開T-Back？」他答：「Tea Bag我就大把。」
旅遊飲食寫作人