可能眼見上集轉營未獲全功，Rabbids「賤兔」趁住兔年重整旗鼓，於新作《Raving Rabbids Travel in Time》大玩時空穿梭Mini Games，透過由洗衣機改裝的時光機，重返古代惡搞經典歷史場面，故事有趣兼可為「賤兔」換上各式靚靚古裝，新年假期最啱4人埋位Wii住比賽，發放無限笑彈。
Ubisoft開發小組在年多前推出「賤兔」想搞新創意，改為冒險式玩法，但坊間反應只屬一般，所以今集《Raving Rabbids Travel in Time》就順應民意，玩番過癮抵死的Mini Games，更將故事舞台搬到博物館裏，只要走到藝術品背後的隱藏通道，就會跌入由洗衣機改裝的時光機，重回經典歷史時刻。雖然大家都不會預期遊戲像上課般講述歷史，但卻能親眼目擊人類鑽木取火、登陸月球等場面，甚至解開獅身人面像何解被打爆鼻樑的「真相」。
遊戲分為5大歷史風格共20款迷你遊戲，除了可扮西部牛仔互射鮑魚刷，戴上達文西式飛行器搶氣球，還可拖住重物鬥快跑完賽道，完成任務後更可開啟新版。由於新作對應Wii Motion Plus操作，可感應出細微動作，令操作變得更靈敏，加上每個小遊戲都支援多人對戰，最多可4人一齊玩，互相整鬼對手，拜年時同親朋戚友玩就最適合不過。
雖然行貨為日版遊戲，但一樣支援網絡連線功能，就算新年留在屋企都可上網同朋友大玩「賤兔」，更可透過群組功能，分享獎杯等成就，於兔年Show off一番。今集另一特點是加入換衫設計，穿梭時空所蒐集的服飾都貫徹「古裝」特點，由拿破崙裝、三劍俠裝、凱撒大帝裝到木乃伊裝都有，只要到博物館的衣帽間就可為「賤兔」換靚衫，令賣相變得更可愛。
類型：Party Game
開發：Ubisoft
平台：Wii
推出日期：已推出
售價：$399（日版）
查詢電話：2418 8896
撰文：布偉倫