數天前看看外電網頁，指美國西岸每百多二百年便會出現周期性的重量級天災橫禍，避得一時避得一世再避多三世，那些天然災難又磨拳擦掌密謀回歸了，各界人士請做好準備好自為之。瞄瞄香港那個讓全體狂操的「美國西岸」，何嘗不是每逢三五七日有會員遭遇不測？這天朋友S就在facebook說：「脫掉衣服把波鞋放在Locker頂去沖澡，回來後波鞋已被偷了。」真可憐！不過我人太賤，寫上：「或許別人愛上你的氣味。」
回應後，我將事情告訴正一起在某某米芝蓮星級餐廳午膳的同枱朋友，立即起哄，甲透露：「有乜咁奇？『美國西岸』經常有人偷嘢。」乙告知：「聽講iPhone最多人偷。」丙自爆：「iPhone梗係有人偷，我老公啲底褲都居然有人偷喎，仲係有汗臭嗰種，仲要被偷兩次。」
好了，話題一發不可收拾。基於傳媒的本能，大家咬着不放問到篤，丁問：「你老公嗰條乜嘢底褲？」丙答：「法國牌子綠色碎花有小氣孔的，我揀嘅，都幾靚架！」戊問：「佢除咗底褲後周圍擺嗎？點會被偷？」丙再答：「因為佢着住底褲去到沖涼間先至除，掛喺浴簾外嘅鈎鈎。」甲問：「點解唔一早除咗鎖喺Locker？」丙解釋：「因為佢話有好多人瞄佢個屁股，唔敢當眾除囉。」乙問：「佢屁股好正咩？」丙氣定神閒在手機按來按去，然後遞過來讓大家鑑賞。嘩，果然又大又圓又無暗瘡。（明天續）
旅遊飲食寫作人