精明拜年 租車勝打的
農曆新年仲有兩個星期就到，多間租車公司都推出了農曆新年租車優惠，方便市民到處去拜年，四天三夜私家車Package可平至$2,200。如果你親友遍布港九新界，又要去開年祈福，租車自駕分分鐘平過你打的（搭的士），仲要冇時間限制。據經驗所得，過年期間的租車需求非常大，七、 八人車尤其搶手，有心租車就要加快行動！
選擇合適車輛
揸車並唔係講玩，也不是講運氣，想開心拜年、平安回家，開車前必須好好認識每輛車的操作和性能，特別是近年推出的汽車，都加入了大量電子設備，如電子Handbrake、Auto Hold等等，唔知點用記得問清楚。假如閣下平日少揸車、路面經驗不足的話，千萬不要揀大馬力汽車，切忌逞強。
收車要Check真
此外，取車前最基本都要Check吓頭燈、水撥和車窗能否正常操作，並檢查胎氣是否足夠及車子有冇花痕，若有不對勁的地方，應立即叫租車公司跟進。假如一切正常也不要着急，還要寫下租車公司緊急聯絡電話，萬一遇上意外或操作問題，都可查詢如何處理。在這裏提醒大家，為己為人，切勿酒後駕駛！
開車前
Check List：
1）頭燈、指揮燈
2）水撥
3）車窗、車門
4）中央鎖
5）胎氣
6）車身有冇花痕
7）油蓋打開方式、燃油種類
8）租車公司緊急聯絡電話
9）導航系統（如適用）
10）汽車說明書（如適用）
Nissan Tiida $2,200
自問揸唔掂大車，又要內櫳夠大，Tiida是你不二之選，其車廂長達2.035米，足以媲美2.0公升級私家車。此外，搭載1.5公升全鋁合金引擎及Xtronic CVT波箱的Tiida，更可輸出109匹馬力，但油耗可低至20km/L，揸車走遍全港都唔會肉赤！
Honda Stepwgn $3,200
Stepwgn一直都以型格、實用見稱，它不僅有世界最大級別的巨型天幕，還加入了同級首創的全隱藏式第三排座椅，以五座布局時，車尾可騰出極大的載物空間。此外，Stepwgn以低地台設計，配合雙電動趟門，上落車都非常輕鬆。
Honda Accord $2,800
今代Accord頗有歐洲車影子，體積龐大兼有貴氣，無論空間、設備都拍得住三、四十萬的德國豪車。同時，Accord的車身用上高拉力鋼鑄造，在NCAP撞擊測試中更獲得最高的五星評級，加上全車設有8安全氣袋，為乘員帶來充分保障。
Nissan Urvan
$2,100
貨Van的特點唔使多講，載物空間一定贏晒私家車，啱晒啲辦年貨，要搬桔、搬桃花的人。近年，貨Van已有自動波，自問揸棍波不精都唔使愁。不過，揸自動波貨Van都要有2號（輕型貨車）牌，得1號牌唔揸得o架！
Toyota Alphard 3.0 $5,000
Alphard是豪氣七人車的代表，車身體積達到4.865米，而且用料豪華，揸去拜年夠晒氣派。Alphard的車廂非常寬敞，配合中排兩張大班櫈，帶來舒適、愜意的乘坐感受。其V6 VVT-i引擎可提供220匹馬力，力水十足。
撰文：鄭浩文 攝影：黎劍華
查詢電話：2768 2277（大昌行汽車租賃）
模特兒：Crystal、Nick（Inspire）