放假清腸胃搶住投素！

素點心網羅多國口味

食素，早已不只是宗教理由，也可以為環保，為個人健康。位於銅鑼灣的波羅密素食，定會叫怕食素單調的朋友刮目相看，餐廳食物的口味非常多元化，幾乎網羅全球，像中式、日式、意式及東南亞等，而即使是中式點心，亦經常有新花款，包括芝心牛肉卷、雜錦粟米餅及菩提馬拉糕等。

其中，芝心牛肉卷炸得香脆，內藏「牛肉」及芝士，一咬開即有芝士流出。招牌菜方面，則有沙律蝦春卷及素翅灌湯餃，邊食邊飲杯滋潤的羅漢果桂圓茶，認真識歎！

鹹魚肉鬆臘腸梅菜煲仔飯 $98 一打開煲蓋竟傳出鹹魚香，好神奇，原來是從發酵過的豆製品而來，有鹹香但冇魚腥味，食到底仲有飯焦，值得連添兩碗飯。	芝士牛肉卷 $18 幼幼長長的春卷，內有素牛肉及芝士，咬開熱辣辣，滋味無窮，大廚建議可蘸點芥末沙律醬伴食。	素翅灌湯餃 $18 真魚翅不環保，想食的話可選這素翅點心，日本素翅爽滑無比，餃子餡則有素火腿、冬菇及雲耳，配以羅漢果及紅棗熬成的素上湯，湯頭清甜。

豆製品變出羊腩鹹魚

時值冬季，這裏亦有時令美食登場，全日供應。除向來受食客歡迎的合時煲仔飯、五菊素蛇羹外，更有新出品鑊仔枝竹羊腩、泰式明爐燒魚等，熱辣辣香噴噴。經小記一試，覺得鹹魚肉鬆臘腸梅菜煲仔飯最神奇，因發酵過的豆製品，竟散發陣陣梅香「鹹魚」味，食到底仲有飯焦，而羊腩煲亦係配料齊全，邊滾邊食夠氣氛！

素食能做出多種味道及質感，主要靠大豆纖維及魔芋施展戲法，前者爽滑、彈牙，後者因為晶瑩剔透，更能做出如「東坡肉」內的「肥肉」，又或者「臘腸」內的「肥肉粒」。餐廳方面主張健康飲食，煮法上少鹽少油少糖，並選購新鮮材料，亦愛自製素食及調製醬汁，食得健康。

五菊素蛇羹 $88 秋冬大熱的美食，以熬上幾小時的藥膳湯底，配以素雞絲、木耳等，食時加點檸檬葉絲及菊花，味道清香。	雜錦粟米餅 $18 今季新品之一，大廚用兩片燒賣皮，夾着粟米粒、素蟹柳及蔬菜粒等煎香，脆口又彈牙。	菩提馬拉糕 $18 因不下豬油，而令質感沒一般的滑溜，但同樣鬆軟好味，還加入了杏仁片及提子乾，清香搭夠。

撰文：楊淑英

攝影：梁偉德

模特兒：Albee、Kelvin（大紅大紫）

查詢電話：2317 6908